49 kilogramë kokainë janë sekuestruar si rezultat i një operacioni të koduar “MERSIN” të zhvilluar në Portin e Durrësit. Droga ishte fshehur në një prej kontejnerëve me banane që ishin nisur nga Ekuadori drejt Shqipërisë, me destinacion Maminasin, për llogari të një firme.
“Si rezultat i operacionit, gjatë kontrollit të imtësishëm të ushtruar në disa kontenierë, u bë e mundur që në njërin prej tyre, i cili ishte i ngarkuar me banane dhe ishte nisur nga Ekuadori me destinacion Shqipërinë, për llogari të një firme me qendër në Maminas, me administrator shtetasin S. Ç., të gjendej dhe sekuestrohej në cilësinë e provës materiale rreth 49 kilogramë lëndë narkotike e dyshuar kokainë”, njofton policia.
Në vijim të veprimeve, u arrestua në flagrancë shtetasi S. Ç., banues në Sauk, Tiranë, administratori i firmës.
Nën drejtimin e Prokurorisë së Rrethit Gjyqësor Durrës, vijon puna për dokumentimin e plotë të kësaj ngjarjeje, identifikimin dhe kapjen e autorëve të tjerë të përfshirë në këtë veprimtari kriminale. Materialet i kaluan Prokurorisë së Rrethit Gjyqësor Durrës, për veprime të mëtejshme./Opinion.al
