Lideri Suprem i Iranit ka refuzuar ndihmën e SHBA për përballimin e koronavirusit duke ngritur dyshime se ajo mund ta përkeqësojë gjendjen e qytetarëve të Iranit.
Në një fjalim drejtuar iranianëve nga televizori Ajatollahu Ali Khamenei tha se “sharlatanët amerikanë” janë ata që mund të kenë krijuar sëmundjen dhe e konsideroi të cuditshme ofertën e SHBA-së për ndihmë.
“Amerika ka ofruar disa herë ndihmë për Iranin. Jeni të akuzuar se e keni krijuar virusin. Nuk e di nëse kjo është apo jo e vërtetë, por është e çuditshme që kërkoni të na ndihmoni. Përveç faktit se nuk keni edhe vetë mjete të mjaftueshme kundër virusit, çfarë ndodh nëse na jepni një ilaç që e bën virusin të qëndrojë gjithmonë në Iran? Nuk e di sa të vërteta janë akuzat ndaj jush, por, përsa kohë që ekzistojnë të tilla akuza, kush është ai njeri normal që do t’ju besonte juve për të sjellë ilaçe? Ka mundësi që ilaçi juaj ta përhapë edhe më shumë këtë virus”, tha Khamenei.
Irani aktualisht numëron 1,685 viktima nga koronavirusi dhe rreth 12 mijë të infektuar aktivë. Ai është vendi më i goditur nga pandemia në Lindjen e Mesme dhe ka përqindjen e dytë më të lartë në botë për numrin e viktimave në raport me numrin e të prekurve. Në Iran kanë vdekur 7.8% e të prekurves, shifër kjo që e kalon vetëm Italia me 9%. /Opinion.al
