Irani tha se do të zvogëlojë angazhimet e parashikuara në marrëveshjen bërthamore të vitit 2015, nëse vendet evropiane dështojnë të mbrojnë ekonominë iraniane nga sanksionet e rivendosura nga Uashingtoni.
“Është e pakuptimtë të vazhdojmë angazhimet e njëanshme nëse nuk gëzojmë përfitimet nga marrëveshja, ashtu siç kanë premtuar palët evropiane në marrëveshje”, tha ministri i Jashtëm iranian, Mohammad Javad Zarif, në një konferencë të përbashkët për media me homologun e tij rus në Moskë.
Ndërkaq Irani ka rritur rezervat me uranium të pasuruar përtej limiteve që parashikon marrëveshja, teksa ka kërcënuar se do të ndërmarrë hapa të tjerë nga 6 shtatori.
Palët evropiane në marrëveshje, Britania, Franca dhe Gjermania kanë kërkuar nga Irani që të veprojë në përputhje me marrëveshjen dhe të mos e shkelë atë.
SHBA-ja është tërhequr vitin e kaluar nga marrëveshja bërthamore, në të cilën parashikohej që Irani të kufizonte programin bërthamor në këmbim të lehtësimit të sanksioneve ndërkombëtare.
Asokohe presidenti amerikan, Donald Trump, ka thënë se u tërhoqën pasi marrëveshja nuk ka qenë mjaftueshëm e ashpër për të penguar Iranin nga krijimi i armëve bërthamore.
Pas tërheqjes nga marrëveshja, Uashingtoni ka rikthyer një varg sanksionesh kundër Republikës Islamike./Opinion.al
