Presidenti iranian, Hassan Rohani deklaroi se Republika Islamike do të rifillojë pasurimin e uraniumit, nëse fuqitë botërore nuk mbrojnë interesat e Iranit kundër sanksioneve të Shteteve të Bashkuara.
Rohanit foli për televizionin shtetëror, në njëvjetorin e largimit të SHBA-së nga marrëveshja bërthamore, marrëveshje që Teherani e ka nënshkruar me fuqitë botërore më 2015, dhe vjen pasi Sekretari amerikan i Shtetit, Mike Pompeo bëri një vizitë të papritur në Irak dhe një aeroplanmbajtëse amerikane është dislokuar në rajonin e gjirit.
Presidenti shtoi se nënshkrueset e tjera të marrëveshjes, Britania, Franca, Gjermania, Kina dhe Rusia kanë 60 ditë afat për të marrë masa për mbrojtjen e sektorit të naftës iraniane dhe atë bankar, ndërsa pohoi se u ka nisur shkresa liderëve të pesë shteteve, duke iu bërë me dije se Irani do të nisë pezullimin e angazhimeve kyçe të marrëveshjes ndërkombëtare dhe nuk do të eksportojë uranium të pasuruar dhe as ujë të rëndë te kombet tjera, ashtu siç është e përcaktuar.
“Këto masa janë për 60 ditë. Nëse në këto 60 ditë evropianët do të ulen me ne në negociata dhe të arrijmë një marrëveshje në interesin tonë, veçanërisht përsa i takon naftës dhe bankave, ne do t’i kthehemi marrëveshjes së vjetër”, tha ndër të tjera ai.
Rohan ka paralajmëruar gjithashtu për një “reagim të ashpër” nëse liderët evropianë vendosin më shumë sanksione ndaj Iranit përmes Këshillit të Sigurimit të Kombeve të Bashkuara.
Pak pas fjalimit të Rohanit, ministri francez i Mbrojtjes, Florence Parly tha se Franca dëshiron të mbajë gjallë marrëveshjen bërthamore dhe ka paralajmëruar se nëse Irani nuk zbaton në tërsi marrëveshjen atëherë mund të vendoset një mekanizëm që nuk përjashton sanksionet.
Kujtojmë se marrëveshja e vitit 2015, i ka siguruar Iranit lirim nga sanksionet ndërkombëtare në këmbim të frenimit të aktivitetit bërthamor, mirëpo presidenti amerikan, Donald Trump në maj të vitit të kaluar tërhoqi SHBA-në nga kjo marrëveshje, duke e cilësuar atë të mangët, pasi sipas tij nuk përfshin zhvillimin e raketave balistike të Teheranit dhe mbështetjen për disa rrjete në Lindje të Mesme./Opinion.al
