Ish-kryeministri Sali Berisha ka komentuar vendimin e qeverisë shqiptare për të shpallur investitor strategjik kompaninë e dhëndrit të Donald Trump, Jared Kushner për të ndërtuar resortin luksoz me vlerë 1.4 miliard dollarë në ishullin e Sazanit.
Në një komunikim me qytetarët në rrjete sociale, Berisha tha se Sazani i është ofruar biznesmenëve të huaj në mënyrë periodike që prej vitit 2001, por kjo oferta e Ramës, sipas tij është për interesa politike.
Pavarësisht kësaj Berisha theksoi se mbështet të gjitha ofertat e sipërmarrjeve të huaja për të investuar në Shqipëri, por duke respektuar rregullat e vendit.
“Prej vitit 2001 deri më sot Sazani i është ofruar biznesmenëve të huaj në mënyrë periodike. Kjo është oferta e radhës që Rama e bëri për të blerë influenca politike. Por një ofertë që plotëson rregullat ligjore ne kemi deklaruar që nuk i kundërshtojmë ofertat që bazohen dhe respektojnë rregullat e vendit, pavarësisht se Edi Rama e ka përdorur për qëllime politike. Kjo është ne tagrin e shqiptarëve për të bërë vlerësimin e tyre për këtë përdorim”, tha Berisha.
