Aksi rrugor Kardhiq – Delvinë është braktisur plotësisht nga qeveria. Ky aks nisi punimet në vitin 2008 dhe projekti total për këtë rrugë ka përfunduar në vitin 2009.
Aksi Kardhiq – Delvinë ka një gjatësi rreth 34 km. Deri më tani janë përfunduar 7.6 km nga Ura e Kardhiqit në drejtim të Fushë Bardhës (Delvinë) dhe 9.7 km nga Delvina në drejtim të Vergos (Ura e Kardhiqit). Në këtë aks mbetet e pa financuar një segment rrugor rreth 16.7 km, e cila kërkon një investim prej 40 milionë dollarë.
Problemet
Lënia pas dore e aksit Kardhiq – Delvinë ka sjellë një sërë problemesh për banorët e zonës dhe për ekonominë e vendit. Aksi i braktisur është kthyer në një rrezik real për mjetet që e përdorin këtë rrugë pasi masive të mëdha dherash bien në çdo moment. Shumë prej banorëve të kësaj zone e kalojnë dimrin në qytet për shkak të vështirësive të komunikimit. Ndërsa transporti drejt tregjeve i produkteve blektoriale është bërë thuajse i pamundur. Edhe pse ka mbetur një pjesël për tu financuar rruga është zhvlerësuar me më shumë se 50% të vlerës për shkak të degradimit fizik dhe mungesës së mirëmbajtjes, e cila rrezikon shkatërrimin edhe të asaj pjese që është ndërtuar. Turizmi kulturor është një tjetër sektor që rrezikohet nga lënia në harresë e aksit Kardhiq – Delvinë. Dhjetra monumente të të kulturës që gjenden në dy anët e malit që lidh Qafa e Skërficës, rrezikojnë shkatërrimin.
Të mirat që sjell ndërtimi i aksit Kardhiq – Delvinë
Përfundimi i këtij aksi rrugor do të sillte avantazhe ekonomike jo vetëm për banorët e zonës por për të gjithë vendin. Nga aspekti rrugor, përfundimi i këtij aksi do të sillte një lehtësi për drejtuesit e mjeteve, të cilët udhëtojnë për në Sarandë. Nëpërmjet kësaj rruge do të shkurtohej ndjeshëm distanca dhe koha për në qytetin e Sarandës. Ajo do të eliminonte dy akse të cilat janë të rrezikshme dhe të lodhshme për drejtuesit e mjeteve. Së pari, do të eliminohej rruga e bregdetit, e cila është një rrugë panoramike dhe me standarte, e kryer nga qeveria e kaluar, por për shkak të kthesave të shumta krijon lodhje dhe mund të kthehet në burim aksidentesh. Së dyti, do të eliminohej qafa e Muzinës, në aksin Gjirokastër – Sarandë. Muzina është një nga rrugët më të rrezikshme të vendit ku përveç kthesave të forta, tashmë është pothuajse e degraduar. Gjithashtu, eliminimi i këtyre dy akseve do të shmangte trafikun e madh që krijohet gjatë sezonit turistik. Duke marrë parasysh që zona e jug-perëndimore është qëndra e turizmit në vend, ndërtimi i aksit Kardhiq – Delvinë do të sillte përfitime për ekonominë. Ndërtimi i saj do të bënte të mundur shkurtimin e kohës për të shkuar në portet e Sarandës dhe Igumenicës, cka do bënte të mundur një fluks më të madh të turistëve në atë zonë, duke rritur hyrje-daljet nga kufiri.
Qeveria
Qeveria aktuale do të përfitonte shumë nga ndërtimi i aksit Kardhiq – Delvinë, por është e pakuptueshme mungesa e investimit dhe braktisja e kësaj rrugë. Përfundimi i saj kërkon një shumë prej 40 milionë dollarësh, e cila është e vogël në krahasim me buxhetin. Edhe në rast se do të konsiderohej e papërballueshme si shumë, vlera që do të merrte mbrapsht shteti nga të mirat që do të që do të sillte rruga do të ishin të pakrahasueshme me vlerën e investimit. Qeveria nuk e ka në axhendën e saj ndërtimin e kesaj rruge. Këtë e tregon edhe fakti se në këto dy vite e gjysëm qeverisje, nuk është kryer asnjë qindarke investim ne kete aks rrugor./citynews
