Ka shënuar golin e parë në ndeshje zyrtare me RNK Splitin, mirëpo një shok i Kombëtares ia ka zhvleftësuar dhe i ka hequr mundësinë që ta festojë me gol
Amir Rrahmani rrëfen për “Panorama Sport” emocionet për golin që ka realizuar, si dhe batutat që ka shkëmbyer për shkodranin e Rijekës.
Ish mbrojtësi i Partizanit ka edhe një koment për derbin, ndërkohë që nuk ngurron të tregojë hapur ekipin që mbështet. Ai ka gjithashtu një urim për veten e tij në lidhje me Kombëtaren. “Besoj dhe shpresoj që edhe në Europian të kem shanse dhe të bëj paraqitje pozitive”, shprehet 22vjeçari.
Ai është vlerësuar me notën shtatë nga mediat kroate për paraqitjen në humbjen 12 ndaj Rijekës. Vlerësim maksimal, jo vetëm për bashkëlojtarët e skuadrës së tij, por edhe për të gjithë takimin.
Keni shënuar golin e parë në ndeshje zyrtare me RNK Splitin. Çfarë ndjesie ishte për ju?
Është ndjenjë e mirë. Aq më tepër për një mbrojtës, që nuk ndodh shumë shpesh të shënosh, ta rrit shumë vlerën. Megjithatë, për fat të keq, ai gol nuk vlejti që të mund t’i jepja pikë skuadrës sime.
Jeni vlerësuar disa herë në formacionin e javës. Çfarë do të thotë për ju ky fakt?
Është diçka shumë pozitive për mua dhe më vjen mirë që po marr një vlerësim për atë që po bëj në fushën e lojës.
Së fundmi është përmendur Volfsburgu si ekip që ka shprehur interesim për ju. Po përveç saj?
Është e vërtetë dhe për të kam mësuar edhe unë që ka shprehur interes, ndërsa për ekipe të tjera nuk di. Për momentin mendoj të ruaj vazhdimësinë e paraqitjeve pozitive me skuadrën që të mund të realizojmë objektivat që kemi për këtë sezon.
Ndeshja e fundit që humbët, ishte një derbi mes lojtarëve të Kombëtares. Çfarë biseduat me Balajn?
Balaj u ndëshkua prej meje me karton të kuq (qesh…).
Pra morët “hak” që nuk e festuat me pikë golin e parë?
Ashtu duket dhe në fund i thashë “e meritove të kuqin se nuk më le që të festoj me pikë golin tim të parë” (qesh…). Në fakt ishte një moment nxitimi në lojë e unë tentova të nis sa më shpejt një top për t’ua pasuar shokëve të skuadrës. Në atë moment, Bekimi më pengon dhe nuk më lejon ta gjuaj. Kjo bëri që të ndëshkohej me kartonin e dytë të verdhë. Pas ndeshjes kemi folur për ndeshjen në përgjithësi.
Nesër (sot) luhet derbi në Shqipëri. Si e parashikoni?
Është një ndeshje shumë e fortë dhe e tillë që çdo futbollist do të donte të ishte në fushë për ta përjetuar emocionin që të jep ai takim. E shoh të tillë që nuk ka favorit. Megjithatë, unë personalisht dua që të fitojë Partizani.
Kanë mbetur disa muaj nga Europiani. Si e pret një futbollist i Kombëtares këtë event, aq më tepër që jeni vetëm 22 vjeç?
Me padurim! E them këtë sepse jam në formë shumë të mirë e po punoj. Në të njëjtën kohë uroj që të ruaj këtë formë dhe të vazhdoj me paraqitje të tilla deri në Europian. Një paraqitje pozitive në Francë do të ishte një plus i madh për mua dhe karrierën time.
Shpresoni të kini minuta duke parë konkurrencën?
Duhet ta mendosh dhe të besosh për diçka që ajo të ndodhë. Besoj se do të ketë shans për çdokënd.
