Petrit Çela biznesmeni i njohur i Elbasanit, pronar i tregut Agro-Ushqimor në një reagim për mediat thotë se nuk është shpallur në kërkim dhe nuk është arrestuar. Ai pretendon se ka shkuar vetë në komisariat për të dhënë sqarime. Kësisoj, ai përgënjeshtron Policinë e Shtetit e cila një ditë më parë deklaroi se ka identifikuar dhe shpallur në kërkim pronarin e Audit të blinduar (targa AA 795 EP) që goditi mjetin e policisë.
Incidenti
Mbrëmjen e së hënës, një makinë luksoze Audi A8 e blinduar ka goditur makinën e zv/drejtorit të Policisë së Elbasanit. Ky i fundit po ndiqte një operacion policor për sekuestrimin e mjeteve të vjedhura apo të trafikuara. Gjatë kontrollit është shoqëruar në komisariat një mjet “Range Rover” me targa AA 040 OJnë pronësi të Çelës por që drejtohej nga shtetasi Kelmend Xhaferri. Në momentin kur policia shoqëronte këtë mjet, një makinë tjetër Audi A8 po në pronësi të Çelës ka goditur nga pas makinën e zv/drejtorit të policisë dhe më pas është larguar.
Lidhur me këtë incident të rëndë policia bëri të ditur se ka arrestuar drejtuesin e Range Rover si dhe personin që ndodhej në vendin e parë, Ledio Zabeli, si dhe rojen e tregut ushqimor. Ky i fundit gjatë kontrollit policor nuk ka pranuar të hapë portën e tregut. Policia ka arritur të hyjë në treg dhe të sekuestrojë për të verifikuar dokumentacion 7 makina luksoze, 3 prej tyre të blinduara.
Biznesmeni Çela, gjatë prononcimit të tij për News 24 deklaroi se natën kur ka ndodhur ngjarja ka qenë në shtëpi dhe jo në drejtim të mjetit Audi A8. Sipas tij, policia e ka marrë makinën në parkingun e tregut. Ai pretendon gjithashtu se policia nuk kishte vendim gjykate për kontroll në treg. “Policia më kontrolli edhe banesën”, vijoi ai. Kjo ngjarje e rëndë është shoqëruar me akuza politike. Basha akuzoi Ramën se po mbron biznesmenët pranë tij dhe po lë policinë në mëshirë të fatit. Po sipas Bashës, makinën e policisë e ka goditur i biri i biznesmenit, Suel Cela dhe dhëndri i kryebashkiakur të Elbasanit.
Makinat e sekuestruara
Mjeti tip “Range Rover” me targa AA 040 OJ në pronësi të shtetasit P.Ç
Mjeti tip “Audi” A8 i dyshuar i blinduar, me targa AA 795 EP në përdorim nga P.Ç (goditi policinë)
Mjeti tip “Audi’” A8 i dyshuar i blinduar me targa AA 478 PV në pronësi të shtetasit P.Ç.
Mjeti tip “Toyota” me targa AA 814 GN, i dyshuar i blinduar në pronësi të shtetasit G. N
Mjeti tip “Audi” me targa AA 862 OI në pronësi të shtetases E.Xh
Mjeti tip Golf me targa AA 097 SA në pronësi të shtetasit E.H
Mjeti tip “Golf” me targa AA 637 KD, në pronësi të shtetasit A. M.
/Opinion.al
*Në foto Petrit Çela
