Korçë- Një Incident me armë ka ndodhur dy netë më parë në Ersekë por nuk është raportuar nga policia. Ka qenë Enlekejd Alibeaj i cili nga selia e PD denoncoi rastin ku është përfshirë një funksionar partie lokal.
Sipas Alibeajt, kryetari i PS-së së Ersekës, Orest Malushi lëviz me armë në qytet dhe kërcënon qytetarët. Ai sqaroi ngjarjen sipas së cilës: “Orest Malushi, në shoqërinë e kreut të PS së Leskovikut, Sergei Peshtani dhe drejtorit të Ujësjellësit, Robert Hamzaj, ka qëlluar me armë drejt anëtarit të Partisë Demokratike, Zylyftar Byreku, në një lokal në Shelegur.
Partia Demokratike akuzon policinë që ka lënë të lirë Orest Malushin. “Shefat e policisë janë kujdesur që banditi i Ramës të jetë i lirë, dhe i lirë është edhe sot pas kësaj ngjarje të rëndë. Shefat e policisë janë kujdesur për drejtuesin e Edi Ramës, me armë në brez që shtin mbi qytetarët, që të mungojnë dhe provat kundër tij, duke prishur kamerat e lokalit”, u shpreh Alibeaj.
Sakaq policia pas reagimit të PD, nxori edhe komunikatën për mediat, ku thotë se 38 vjeçari O.M., po ndiqet në gjendje të lirë për kanosje. Procedimi ndaj tij filloi pas kallëzimit të shtetasit Z.B., 52 vjeç, banues në Taç – Kolonjë, se pas një konflikti për motive të dobëta në një lokal është kanosur me armë.
“Policia lokale kreu veprimet e plota hetimore, si dhe kreu disa kontrolle, por nuk u konstatua armë. Në kushtet kur nuk është gjetur arma që pretendon kallëzuesi, Prokurori i çështjes vendosi procedimin në gjendje të lirë të autorit të dyshuar”, thuhet në njoftim. /Opinion.al
