Dje në Lezhë u luajt kryendeshja e javës së 23-të të Kategorisë së Parë në Grupin A mes Beselidhjes dhe Kamzës. Interesi për këtë takim ishte i madh dhe një numër i konsiderueshëm tifozësh, duke përfshirë dhe ata që kishin udhëtuar që nga Kamza, ishin të pranishëm në stadium.
Pavarësisht masave të marra për mbarëvajtjen e këtij takimi, një përplasje mes dy tifozerive ishte e pamundur të shmangej. Ofendimet në distancë sollën acarimin e gjakrave dhe një grup tifozësh lezhjanë iu afruan tribunës ku qëndronin mbështetësit e Kamzës duke hedhur drejt tyre mjete të forta, shkruan panorama.
Forcat e rendit ndërhynë shpejt duke larguar në vendet e tyre tifozët lezhjanë, por kjo nuk mjaftoi për të shmangur lëndimin e një tifozi të Kamzës i cili u dërgua me ambulancë në spital.
