Ditën e sotme u inagurua autostrada “Arbën Xhaferi”, e cila shtrihet nga Prishtina në Han të Elezit, në kufi me Maqedoninë e Veriut.
Autostrada, së cilës i është vënë emri i politikanit të ndjerë shqiptar nga Maqedonia e Veriut, Arbën Xhaferi, ka gjatësi prej 60 kilometrash dhe ka gjithsej 13 ura, duke përfshirë edhe më të gjatën në rajon me gjatësi prej 5.7 km.
Në të ardhmen, kjo autostradë pritet të lidhë kryeqytetin e Kosovës me Shkupin.
Sipas autoriteteve autostrada i ka kushtuar buxhetit të Kosovës, mbi 600 milionë euro, ndërsa në ceremoninë e inaugurimit morën pjesë presidenti i Kosovës, Hashim Thaçi, kryeministri Ramush Haradinaj, kryeministri i Maqedonisë së Veriut, Zoran Zaev dhe ai i Malit të Zi, Dushko Markoviq./Opinion.al
