I gjithë opercaioni “Van Damme” i koordinuar nga policia italiane dhe ajo kosovare, është një spektakël. Kështu është shprehur Ismail Imishti, njëri nga tre të arrestuarit nën akuzën e propagandimit të ideologjisë xhihadiste dhe nxitjes së urrejtjes fetare.
Në një intervistë për “Gazetën Express”, shqiptari nga Hani i Elezit në Kosovë, rrëfen se e gjithë kjo është një përpjekje e policisë dhe mediave me qëllim paraqitjen e kosovarëve si përkrahës të ISIS. Ismail Imishti thotë se në rajonin e policisë së Breshias ku u mbajt i ndaluar, nuk iu bë asnjë pyetje në lidhje me terrorizmin, por iu tha se është pjesë e hetimeve për shkak të publikimeve në Facebook.
Autoritetet italiane besonin se dy vëllezërit kosovarë Ismail dhe Samet Imishti, i përkisnin një grupi terrorist që po planifikonte një atentat ndaj Papa Françeskut. Por Ismail Imishti i hedh poshtë këto akuza.
Ndërsa për të vëllain, Sametin, ai thotë se ka pasur probleme mendore në kohën kur ishtë në Itali. Në vitin 2012 ai është trajtuar në një spital psikiatrik, por nuk është shëruar plotësisht, sipas Ismailit. “Edhe nëse ka shkruar diçka, nuk e ka menduar gjatë, por ju garantoj se nuk e ka bërë për nxitje të urrejtjes fetare”, ka thënë Ismail Imishti.
Vëllezërit Imishti u arrestuan më datë 1 dhjetor në një operacion të përbashkët në Breshia dhe në Han të Elezit në Kosovë. Ismail Imishti u lirua për mungesë provash, por u deportua nga Italia një javë më parë.
