“Gëzuar për fillimin e funksionimit të Gjykatës Kushtetuese”, më këto fjalë e nisi konferencën e tij Presidenti Ilir Meta, teksa në dorë mbante gotën e ujit.
Më pas pa marrë shumë kohë, kreu i shtetit u hodh direkt në “aksion”.
“Dëshiroj t’ju bëjë të ditur vendimin tim si President i Republikës dhe kryetar i shteti për të paraqitur ditën e hënë kallëzim penal si president i republikës kundër zotit Ardian Dvorani, kreu i KED, me adresë Gjykata e Lartë. Unë Presidenti i Republikës dhe kryetari i shtetit akuzoj zotin Ardian Drovanin për këto vepra penale: Shpërdorim i detyrës dhe përvetësim i titullit apo detyrës shtetërore”, tha Ilir Meta.
Më pas ai argumentoi edhe pse mori këtë vendim, kundër Ardian Dvoranit, kreut të KED, të cilin e akuzon për veprime mafioze.
“KED i cili është organ kolegjial, jo personal, askush nuk merr dot vendime personale dhe që funksionon në bazë të ligjit, në mbledhje të datës 21 shtator nuk ka marrë vendim mbi kohën dhe mënyrën e dërgimit të listave për Presidentin apo Kuvendin. Kryetari i ka përcjellë vetë listat për plotësimin e dy vakancave për njëherë. KED nuk mori vendim për mënyrë e dërgimit të listave apo kohën, por ky veprim është kryer në mënyrë individuale dhe të qëllimshme nga kryetari i KED-së, ndërkohë që ka si detyrë vetëm për të nënshtruar aktet. I gjendur përballë kësaj situate për dy lista njëherazi, Presidenti iu drejtua kryetarit të KED për informacion nëse ia kishte përcjellë edhe Kuvendit listat për dy vendet vakante. Kryetari i KED-së informoi ka përcjellë dhe dorëzuar pranë Kuvendit listat përfundimtare. Pra katër vakancat Këshilli i ka miratuar në një ditë dhe zotëria, në titullin personal në vend që të respektonte kronologjinë, Presidentit ia dërgon më parë dhe Kuvendit vetëm atë që Presidenti e pyet, po Kuvendit? Edhe ai thotë po ia cova. Kryetari i KED-së 6 ditë pasi ia dërgoi Presidentit ia coi Kuvendit për plotësimin e dy vakancave. Pse janë dërguar dy lista njëherazi të presidenti dhe pse u vonuan me një javë diferencë te Kuvendi. Pra secili mund të bëjë pyetjen, kur KED katër listat i ka renditur në një ditë dhe që e di mirë radhën, pse ja con Presidentit përpara dhe Kuvendit atë ditë që i shkroi Kuvendit. Në rastin më të keq, cdo budalla mund të thotë pse nuk ua dërgoi në të njëjtën ditë dhe të ishte afati 30 ditë për dy palët që të detyroheshin të merreshin vesh” tha më tej Presidenti.
Ndërkohë Gjykata Kushtetuese njeh Marsida Xhaferllarin si anëtare të saj. Në një njoftim për mediat, Gjykata Kushtetuese ka listuar zonjën Xhaferllari si gjyqtare me kompetenca të plota, në listën e gjyqtarëve që plotësojnë kushtet e parashikuara në ligj për të qenë anëtar të Këshillit të Emërimeve në Drejtësi.
Njoftimi i dytë pasoi një njoftim të mëparshëm, në të cilin thuhej se katër anëtarët e Gykatës Kushtetuese që janë në detyre, Vitore Tusha, Besnik Muçi, Elsa Toska dhe Fiona Papajorgji, nuk kishin marrë dot një vendim zyrtar për mandatin e asaj që pretendon të jetë kolegia e tyre e re, Arta Vorpsi.
Në një njoftim për mediat, Gjykata Kushtetuese sqaron se “edhe pas plotësimit të disa prej vakancave në përbërjen e saj, nuk e ka ende kuorumin e nevojshëm për të shqyrtuar dhe vendosur në seancë gjyqësore lidhur me kërkesat që paraqiten përpara saj. Për këtë arsye ajo nuk mund të ushtrojë kompetencat e saj thelbësore apo juridiksionale lidhur me zgjidhjen e konfliktit të kompetencave midis pushteteve apo organeve kushtetuese, si dhe as ato kompetenca që lidhen me shqyrtimin e kushtetutshmërisë së akteve të nxjerra nga organet e pushtetit publik”.
Në mbledhje nuk ka qenë e pranishme Marsida Xhaferllari, ndërsa Arta Vorpsi ishte pikërisht ajo që kishte thirrur mbledhjen, duke u kërkuar që t’i njihnin mandatin./ Opinion.al
