30 gola në 20 ndeshjet e fundit të luajtura në shtëpi në kampionat (Ligue 1+Premier League), katër gola në tri ndeshjet e para zyrtare të luajtura me Manchester United (ka shënuar edhe në Superkupën e Anglisë kundër Leicester). Zlatan Ibrahimovic, i marrë me kosto zero në merkaton e verës, mund të thuhet se është “blerja” më e mirë e United, që sot ka aktivizuar nga minuta e parë Paul Labile Pogba, lojtarin më të shtrenjtë të historisë së futbollit, i cili ka bërë debutimin e tij të dytë me “Djajtë e Kuq”, me të cilët kishte luajtur për herë të fundit më 18 mars të 2012-ës, 1616 ditë më parë. Por edhe lojtari më i shtrenjtë i të gjitha kohërave, i cili ka bërë një paraqitje normale, ka qenë i detyruar të përkulet para madhështisë së Zlatan.
Suedezi ka zhbllokuar ndeshjen në minutën e 36-të të pjesës së parë kur ka mundur portierin Forster me një goditje të bukur me kokë, pas një krosimi perfekt të Wayne Rooney, i cili ka zhvilluar mbrëmjen e sotme ndeshjen e tij numër 600 si futbollist profesionist (523 me United, 77 me Everton). Një gol ky që i ka dhënë frymëmarrje skuadrës së Mourinho-s që, pavarësisht emrave të mëdhenj, nuk e ka dominuar sfidën, të paktën në pjesën e parë. Në 45 minutat e dyta, më saktësisht në minutën e 52-të ka ardhur edhe goli i dytë personal i sulmuesit suedez, i cili ka futur në kasafortë tri pikët e radhës për Manchester United nga pika e bardhë e 11 metrave, pas penalltisë së fituar nga Shaw.
Pas këtij momenti vendasit e kanë pasur më të lehtë të kontrollojnë ndeshjen dhe të mbrojnë rezultatin. Në minutën e 64-t ka qenë Pogba që ka shkuar afër realizimit të golit të tretë me një goditje me kokë që ka përfunduar sipër traversës. Dominimi i lojtarëve të Mou ka qenë total dhe një minutë më vonë Martial ka humbur një rast të artë, pasi është vonuar në goditjen e topit, teksa gjuajtja e tij është bllokuar nga mbrojtësit e Southampton. Miqtë kanë reaguar në minutën e 75-të, me goditjen e Long që ka përfunduar për pak jashtë. Në minutën e 89-të Mourinho e ka shpërblyer Ibrahimovic duke e bërë kapiten të ekipit, pasi ka zëvendësuar Rooney me Smalling, me shiritin prestigjioz që ka kaluar në krahun e suedezit, i cili është zëvendës kapiteni i “Djajve”. Ndeshja është mbyllur me rezultatin 2-0 dhe United kryeson përkohësisht i vetëm renditjen në kuotën e 6 pikëve pas dy ndeshjeve.
