Autoritetet kanë mundur të identifikojnë personin që vendosi tritol në fasadën e një lokali në Fushë-Krujë më 31 janar.
Policia ka shpallur në kërkim 40-vjeçarin Mirgen Zalla. Ndërkohë, është vënë në pranga 41-vjeçari i shpallur në kërkim më parë për këtë ngjarje. Nga hetimet rezultoi se 41 vjeçari është bashkëpunëtor i autorit kryesor të ngjarjes.
“Si rezultat i veprimeve hetimore dhe operacionale të kryera me qëllim zbardhjen dhe dokumentimin e plotë të ngjarjes së ndodhur me datë 31.01.2025, ku u dëmtua me lëndë plasëse, fasada e një lokali në Fushë Krujë, kanë bërë të mundur identifikimin dhe shpalljen në kërkim të autorit të ngjarjes shtetasin Mirgen Zalla, 40 vjeç si dhe kapjen dhe ndalimin e shtetasit M. T., 41 vjeç, i identifikuar si bashkëpunëtori i shtetasit Mirgen Zalla.
Shtetasi Mirgen Zalla, dyshohet se ka vendosur lëndën plasëse në lokalin e shtetasit B. T., dhe më pas është larguar nga vendi i ngjarjes me automjetin e shtetasit M. T. Gjatë kontrollit të banesës së shtetasit Mirgen Zalla, shërbimet e Policisë kanë gjetur e sekuestruar një armë gjahu pa leje, një armë sportive dhe municion. Shërbimet e Policisë po punojnë për kapjen e shtetasit Mirgen Zalla. Materialet procedurale iu referuan Prokurorisë së Tiranës, për veprime të mëtejshme”,- njofton policia.
