Orland Paplekaj, personi ndaj të cilit dyshohet se të shtunën më 16 prill iu bë një atentat teksa po lëviste me kamionçinë në rrugën dytësore Xhafzotaj-Durrës ka rrëfyer se nuk ka qenë ai shënjestër e atentatit por një person tjetër, që kishte kaluar pranë tij.
“Në momentin që u bë atentati, kamionçina, ka qenë e ndaluar. Isha duke komunikuar me disa persona që ndodheshin aty pranë. Në këtë moment ka kaluar pranë nesh një person tjetër dhe në këtë moment u qëllua me armë.” ka thënë Paplekaj për ABC.
Ai dyshon se atentati nuk është kryer kundër tij, por kundër një personi që i kaloi pranë.
“Unë personalisht, mendoj se atentati mund të ketë qenë ndaj atij, personit tjetër.” Ka shtuar Paplekaj.
Ndër të tjera Paplekaj është shprehur se atentati mund të jetë bërë kundër punëdhënësit të tij.
“Kam frikë mos është një atentat, ose paralajmërim ndaj punëdhënësit tim, pasi unë nuk kam asnjë konflikt”- u shpreh babai i dy fëmijëve.
Së fundit, ai punonte si shpërndarës i bombolave të gazit dhe atentati iu bë gjatë orës së punës.
Megjithatë, policia nuk përjashton edhe pistën e inskenimit, pasi kamionçina e tij nuk u prek nga asnjë plumb. Por këtë Paplekaj ka deklaruar se nuk ka synim të fitojë azil. Po ashtu ai hedh poshtë edhe lidhjet që mund të jetë bërë për shkak të profesionin e të atit si polic.
“Nuk ka asnjë inskenim, për azil. Jam me letra të huaja. As nuk është e vërtetë që ngjarja mund të ketë lidhje më punën e tim ati, që është polic, apo me punën time si roje sigurie. Deklarata ime në polici i qëndroj faktit që nuk e kam idenë se kush është motivi i këtij atentati. Policia më pyeti dhe për personin tjetër që ndodhej aty pranë, dhe unë nuk e njihja” është shprehu Orland Paplekaj.
Orland Paplekaj babai i dy fëmijëve, u qëllua nga një makinë “Golf” në lëvizje, që pas të shtënave u largua përmes një rruge të ngushtë, me dalje në autostradën Tiranë-Durrës. Blutë e Durrësit janë vënë në kërkim të autorit.
