Mediat greke vijojnë të publikojnë detaje nga ngjarja e rëndë, ku biznesmeni shqiptar Xhani Topalli, u vra në Greqi nga pronari i një hoteli.
53-vjeçari identiteti i të cilit nuk bëhet i ditur, ka pranuar krimin e rëndë dhe u ka treguar autoriteteve greke se ku e kishte fshehur kufomën e shqiptarit.
Sipas mediave greke vdekja është shkaktuar nga mbytja me litar, ndërsa është arrestuar edhe djali i autorit si bashkëpunëtor në ngjarje, pasi dyshohet se ka ndihmuar të atin në fshehjen e trupit të pajetë.
Topalli, baba i tre fëmijëve të mitur, ishte shpallur i zhdukur që prej 28 Gushtit. Në ditën e fundit të zhdukjes së tij ai kishte takuar një 53-vjeçar, pronar hoteli në Greqi, i cili kishte për t’i shlyer disa detyrime në bazë të një marrëveshje që ato kishin lidhur.
Sipas informacioneve të “Demokratiki”, 53-vjeçari është takuar fillimisht me pronarin e hotelit në vitin 2014, kohë kur ata nisën partneritetin. Në vitin 2019, 46-vjeçari shqiptar ka marrë përsipër rinovimin e hotelit të autorit të krimit, dhe si rrjedhojë pronari i hotelit i kishte një borxh rreth 75 mijë euro.
Mbrëmjen e së dielës, viktima ka shkuar në hotelin e 53-vjeçarit, dhe kanë debatuar.
Sipas rrëfimit të autorit të ngjarjes 46-vjeçari po i bënte presion për dhënien e borxhit dhe se kishte shkuar shumë herë në hotel nën efektin e alkoolit, duke e shqetësuar.
Të dielën mbrëma, shqiptari, siç pretendon autori, ka shkuar në hotel nën efektin e alkoolit dhe ka sulmuar djalin e tij.
Më pas, autori thotë se ai ka dalë përpara, për të mbrojtur djalin e tij nga goditjet e shqiptarit dhe i shtyrë nga instinktet e tij për të mbrojtur të birin ka kapur një litar të cilin ia ka shtrënguar në qafë shqiptarit duke i shkaktuar vdekjen.
Më pas së bashku me të birin e kanë zhveshur, i kanë hedhur rrobat dhe trupin e kanë çuar në rrugën e shkretë ku është gjetur nga policia.
