Një pastor i vetëshpallur në Kenia, i cili ishte ndjekur penalisht për “terrorizëm”, akuzohet gjithashtu për “vrasje nga pakujdesia” pas vdekjes së 429 ndjekësve të sektit të tij, të cilët ai i bindi të agjëronin deri në vdekje.
Paul Dhenge Mackenzie së bashku me 94 të akuzuar të tjerë, përfshirë edhe gruan e tij akuzohet për 238 vdekje, nga gjykata në Mombasa.
Ai pretendon se është i pafajshëm, por viktimat e para u identifikuan në pyllin Sakahola të bregdetit kenian, ku ka qenë aktive “Kisha Ndërkombëtare e Lajmit të Mirë” ungjillore, e drejtuar prej tij.
Prokurorët njoftuan më 16 janar se duan të ndjekin penalisht rreth dhjetë vepra kundër të akuzuarve për “masakrën e Sakaholës”, e cila tronditi Kenian pranverën e kaluar.
Dy ditë më vonë Mackenzie u ndoq penalisht për “lehtësim të kryerjes së një akti terrorist”, “pjesëmarrje në veprimtari të organizuar, kriminale” dhe “radikalizim”.
Një gjykatë tjetër, në qytetin e Malindit, urdhëroi një ekzaminim psikiatrik për pastorin dhe 30 të bashkëakuzuarit e tij përpara se të shqyrtonte hetimin e tij për vrasje.
Të enjten mund të ngrihen edhe akuza të reja ndaj të akuzuarve për krime ndaj fëmijëve të mitur.
Mackenzie, i cili ishte një shofer taksie përpara se të themelonte kishën e tij, është i arrestuar që nga 14 prilli 2023.
Shumica e viktimave në pyllin Sakahola vdiqën nga uria pasi ndoqën predikimin e Mackenzie që u kërkonte të agjëronin deri në vdekje për të “takuar Jezusin” përpara se të vinte fundi i botës, gjë që ai parashikoi se do të ndodhte në gusht 2023. Disa nga viktimat, përfshirë fëmijët, u mbytën ose u rrahën deri në vdekje.
Zbulimi i skandalit vuri në siklet autoritetet keniane sepse nuk e ndaluan pastorin e supozuar, edhe pse ai ishte arrestuar disa herë në të kaluarën për predikimin e tij ekstremist.
Një komision i Senatit në raportin e tij në tetor vuri në dukje gabimet e autoriteteve policore dhe gjyqësore që ishin njoftuar dy herë për Mackenzie, në 2017 dhe 2019.
