Gjykata e Posaçme e Apelit la në fuqi dënimin me burgim të përjetshëm për Festim Bexhdilin, i cili u shpall fajtor për rrëmbimin, vrasjen dhe zhdukjen e trupit të Jan Prengës në 2020-n. Kopshtari i resortit ku është mbajtur për disa orë peng Prenga kishte kërkuar pafajësi në Apel.
“Deklarojmë fajtor të pandehurin Festim Bexhdili për kryerjen e veprës penale “Rrëmbimi apo mbajtja peng e personit” kur është shkaktuar vdekja, e kryer në bashkëpunim ne formën e posaçme të grupit të strukturuar kriminal parashikuar nga neni 109/3 – 28/4 të Kodit Penal dhe në bazë të kësaj dispozite dënimin e tij me burgim të përjetshëm”, thuhet në njoftim.
Edhe pse në mungesë të një kufome, gjykata argumenton se për shkak të gjakut të gjetur dhe pamjeve filmike në resortin në Shijak, Jan Prenga ka humbur jetën.
Disa ditë më parë, Gjykata e Shkallës së Parë nisi gjykimin në mungesë për porositësit e ngjarjes së rëndë.
