Ish drejtori i përgjithshëm i Juventusit, Luciano Moggi, beson se Juventusi mund të përmbysë rezultatin negativ ndaj Atletico Madridit. Në intervistën e dhënë për një media italiane, Moggi ka thënë se gjatë kohës kur ai ka qenë në krye të Juventusit, ekipi ka përmbysur shumë ndeshje. Një gjë e tillë, ai mendon se është në ADN-në e ekipit.
“Në fazën me eliminim direkt janë të vlefshme të dyja ndeshjet dhe skuadrat kanë mundësi të rikuperojnë gabimet e ndeshjes së parë. Në kohën kur unë kam qenë pjesë e Juventusit mbaj mend që kemi përmbysur shumë takime dhe diçka të tille e kemi në ADN-në tonë. Jam plotësisht i bindur se skuadra e Allegrit do ta përmbysë humbjen e ndeshjes së parë në Spanjë. Juventus duhet të reflektojë dhe të përgatitet për ndeshjen e kthimit, ku mundësitë që të kalojnë më tej janë të mëdha. Sa i përket gjestit të shëmtuar të Simeones mendoj se Allegri nuk do të bënte diçka të tillë”, është shprehur Luciano Moggi.
Vitin e kaluar, Juventusi pas humbjes së rëndë 3-0 ndaj Real Madridit, arriti ta përmbyste rezultatin në Torino, ku vetëm një penallti e minutës së fundit i mohoi mundësinë e kualifikimit. Një gjë të tillë tifozët shpresojnë që të përsëritet ndaj Atletico Madrid, duke besuar edhe te aftësitë e Cristiano Ronaldos./Opinion.al
