Partia Socialiste fitoi Bashkinë e Rrogozhinës me një diferencë të ngushtë vetëm 23 vota më shumë.
Ndërkaq, teksa është mbyllur numërimi që prej ditës së djeshme, kandidati i koalicionit “Bashkë Fitojmë”, Shkëlqim Hoxha, ka reaguar ditën e sotme në rrjetet sociale në lidhje me këtë rezultat.
Ai u shpreh se banorët e Rrogozhinës e votuan dhe i besuan përgjegjësinë për drejtimin e bashkisë.
Por ai hedh akuza se pushteti tjetërsoi fitoren. Sipas tij ka dhjetëra aryse që beteja ligjore të kthejë hakun tek qytetarët.
“Motra e Vëllezër, banorë të Rrogozhinës, Lekajt, Kryevidhit, Gosës e Sinaballaj. Miqtë e mi, bashkëpunëtorë e dashamirës! Përulem me shumë mirënjohje e respekt, para çdonjërit nga Ju! Këto muaj të rrugëtimit tonë, kuptova e ndamë së bashku: shqetësimet, problemet dhe nisëm rrugën e përbashkët të kthimit të Pushtetit te Ju, pronarët e vërtetë të Bashkisë Rrogozhinë.
Ju votuat për ndryshimin, për ta ushtruar ju pushtetin, duke përbuzur e përballur njëkohësisht makinerinë e pushtetit, që bëri gjithçka, për të deformuar vullnetin tuaj. Banorët e Rrogozhinës na votuan, na besuan përgjegjësinë e drejtimit të Bashkisë.
Qeveria e Pushteti në mënyrë të paligjshme hartojnë lista me banorë extra, që nuk e ndjejnë përgjegjësinë e votës, e kështu tentojnë të tjetërsojnë fitoren. Miqtë e mi, ka dhjetëra arsye që beteja ligjore do kthejë hakun te ju”, u shpreh Hoxha.
