Doktoresha, Tokjona Lajçi, i qëndroi afër babait të saj, të prekur me Covid-19 për rreth dy javë në Klinikën Infektive të Kosovës. Gjatë kësaj kohe doktoresha u infektua edhe vetë.
Fatkeqësisht babai i saj nuk arriti ta mposhtë sëmundjen. Humbja e tij ishte një goditje e fortë për doktoreshën.
Sopranoja kosovare, Arta Jashari, tregon bisedën me doktoreshën, e cila mes të tjerash i ka thënë se “nuk ja fal dot vetes, jam doktoreshë dhe kam dështuar”.
Historinë e dhimbshme, Jashari e ka treguar në një postim në Facebook, me rastin e ditëlindjes së doktoreshë Lajçit.
Ajo i jep asaj kurajo duke i thënë se është një heroinë që ka bërë çmos për të shpëtuar babain e saj.
“Mbrëmë mora një mesazh shumë të prekshëm dhe dua ta ndaj me ju. Përderisa ishim në Pulmologji me babin, paralel me ne ishte dhe Dr. Tokjona Lajçi me babin e saj, shkrimtarin dhe avokatin Ali Lajçi, tashmë i ndjerë. Dr. Tokjona për 12 ditë rresht u kujdes për babin e saj të prekur me Covid19 në Klinikën Infektive, ku edhe u infektua ajo vehtë dhe i qëndroi afër deri në frymën e fundit babit të saj.
Më tha: “Nuk po ja fali dot vehtes, se jam doktorreshë dhe kam dështuar…” Sot, në ditëlindjen e saj desha të t’i them publikisht Tokjona Lajçi që ti për të gjith ne që jemi në të njejtin vagon përballë kësaj tragjedie, që ti nuk ke dështuar, por je një Heroinë që ke bërë çmos për të shpëtuar babin tënd. Zoti të lehtësoftë dhimbjen, i qoftë dheu i lehtë babit tënd dhe të gjith atyre që kanë humbur në këtë betejë”, shkruan Arta Jashari. /Opinion.al
