Dy emigrantë të dëshpëruar tentuan vetëvrasjen në qendër të Athinës, kryeqytetit të Greqisë, në kohën kur zhgënjimi po shtohet me mbylljen e kufijve. Njëri prej tyre, një pakistanez mbeti pa ndjenja, pasi tentoi të varej në një peme, me një litar të improvizuar nga lidhja e disa rrobave.
Duke iu referuar shifrave të publikuara nga autoritetet greke, rreth 20 mijë emigrantë kanë mbetur të bllokuar pasi Maqedonia fqinje mbylli kufirin për të gjithë ata që nuk ishin sirianë apo irakenë.
Me thuajse të gjithë qendrat e emigrantëve të mbipopulluara, autoritetet greke po përdorin stadiumet si vendstrehime të përkohshme për emigrantët.
Pas takimit të ministrave të Brendshëm të BE -së në Bruksel, Komisioneri për Emigracionin, Dimitris Avramopulos tha se zyrtarëve të BE -se u kanë mbetur vetëm 10 ditë për të pakësuar fluksin e emigrantëve nga Turqia, ose përndryshe, sistemi Shengeni rrezikon kolapsin.
Media gjermane raportoi të premten se deri në 2020 vendi mund të përballet me rreth 2.5 milionë emigrantë të tjerë. E përditshmja gjermane “Süddeutsche Zeitung” raportoi të premten se mbi 13 % apo 130 mijë azilkërkues rezultojnë të zhdukur.
Sipas Ministrisë së Brendshme arsyet janë udhëtimi drejt një vendi tjetër ose e ashtuquajtur “zhytja në ilegalitet”.
Tv Klan
