Një takim homazh nderimi u organizua nga Universiteti i Shkodrës “Luigj Gurakuqi” në kujtim të Profesor Sami Repishtit ,” i cili u nda nga jeta pak ditë më parë në Shtetet e Bashkuara të Amerikës.
Rektori i Universitetit, profesor Tonin Gjuraj theksoi se Repishti ishte një personalitet dhe humanist i shquar.
“Kur shqetësimet për botën dhe Shqipërinë janë të shumta, largimi nga jeta i një mendimtari të madh si profesor Sami Repishti shënon një humbje të madhe,” tha profesori Tonin Gjuraj.
“Shpreh mirënjohje të thellë për të gjithë ju që keni ardhur të nderoni sot Sami Repishtin, njeriun që e jetoi jetën në mënyrë të jashtëzakonshme. Sami ishte bashkëshorti, baba dhe patriot i familjes së madhe, luftëtar i lirisë, shkrimtar, mësues dhe për shumë të tjerë ishte hero,” tha mbesa e tij, Ardita Repishti.
Kryetari i Bashkisë Shkodër Benet Beci e cilësoje si një model frymëzimi për të gjithë, dhe se banesa e tij do shndërrohet në një muze.
“Shtëpia e profesor Repishtiti të jetë një nga pikat e vizitueshme. Ka shumë të thënë, ka dhënë shumë dhe ne kemi shumë respekt për të. Kështu që sot ne japim një mesazh për këtë figurë të shquar të Shkodrës,” tha kryebashkiaku Benet Beci.
Sami Repishti, një intelektual, humanist, dhe aktivist i palodhur për të drejtat e njeriut. I lindur në 1925në Shkodër, ai përjetoi dhe sfidoi periudha të vështira të historisë shqiptare, duke përfshirë vuajtjet gjatë regjimit komunist.
Për shkak të bindjeve të tij dhe përkushtimit ndaj lirisë, ai kaloi disa vite në burgjet e diktaturës. Pas arratisjes nga Shqipëria, Sami Repishti u vendos në Shtetet e Bashkuara të Amerikës, ku vazhdoi aktivitetin e tij intelektual dhe humanitar. Ai u bë një zë i fuqishëm në diasporën shqiptare, duke promovuar vlerat e demokracisë, të drejtave të njeriut dhe identitetit kombëtar.
Klan News
