Qeveria holandeze do të kundërshtojë edhe këtë herë hapjen e negociatave me Shqipërinë duke kërkuar nga Këshilli Evropian hapjen e negociatave vetëm me Maqedoninë e Veriut. Ky qëndrim u përsërit nga ministri i jashtëm holandez Stef Blok gjatë raportimit në komisionin parlamentar për çështjet evropiane ku u theksua se jo vetëm Tirana nuk ka realizuar kushtet e vëna nga Këshilli evropian por ka bërë hapa prapa.
Stef Blok, Ministri i jashtëm i Holandës: Unë besoj se Maqedonia Veriore dhe Shqipëria duhet të vlerësohen në mënyrë të pavarur sepse janë dy shtete me probleme të ndryshme si dhe progres ndryshëm. Shkalla e përparimit të reformave dhe stabiliteti politik në Maqedoni është qartë më i dukshëm se në Shqipëri por ata në Shkup duhet të ndërmarrin hapin e miratimit në parlament të ligjit për prokurorinë e pavarur. Kjo është një pikë kushtetuese. Kur ta kenë bërë këtë, unë mendoj se hapja e negociatave do të bëhet realitet. Shqipëria është me të vërtetë një rast tjetër. Ekziston edhe një mocion i miratuar nga parlamenti ynë në lidhje me Shqipërinë. Shqipëria do të fillojë negociatat sapo të plotësojë kriteret e përcaktuara nga Këshilli Evropian në vitin 2018. Ky nuk është ende rasti. Herën e fundit që Këshilli vendosi zyrtarisht për këtë, më shumë se një vit më parë, ne, Franca dhe Danimarka kishin këtë pozicion dhe nuk kam indikacione se ka ndryshuar diçka qe nga ajo kohë
Në këto kushte parlamenti holandez ndryshe nga ai gjerman nuk do të këtë një seance plenare për të autorizuar qeverinë Rutte për të hapur dritën jeshile për Shqipërinë duke mbetur ne fuqi mocioni i votuar kundër vendit tone me 21 Qershor 2018 nga 125 deputetë nga shumica dhe opozita ne Hage.
Sipas njërit prej propozuesve te atij mocioni deputetit Pieter Omtzigt edhe kete rradhe rezultatet e Shqipërisë janë të pamjaftueshme për të ndërmarrë një hap të tillë.
Z. Omtzigt (CDA), deputet: Unë dëgjova zonjën Mogherini se ka pasur disa zhvillime pozitive në Shqipëri gjatë muajve të fundit. Me gjithë ndershmëri: Shpresoj t’i shoh, por me të vërtetë atje flitet për përfshirjen e mafias në partinë në pushtet, ka patur një bojkot të plotë te opozitës ne zgjedhjet lokale dhe ka probleme të mëdha me kriminalitetin dhe trafikun e drogës. Kam një ndjenjë të sinqertë që ata janë duke lëvizur prapa në krahasim me atë ku ishin një vit me pare”.
Do të mjaftonte kundërshtimi i një shteti të vetëm, ne këtë rast Holanda që negociatat për anëtarësimin e Shqipërisë në BE të mos hapen me 18 Tetor duke pritur qe kushtet e vena një vit me pare te plotesohen./ Burimi: Klan Plus
