Presidenti i Shteteve të Bashkuara, Barack Obama, do të vizitojë Hiroshimën brenda këtij muaji gjatë turit të tij aziatik që do të zgjasë nga data 21 deri në 28 Maj.
Kjo është hera e parë që një president amerikan në detyrë do të vizitojë zonën e bombarduar nga ushtria amerikane në vitin 1945.
Lajmi u konfirmua edhe nga zyrtarë të Shtëpisë së Bardhë, të cilët thanë se kjo është një politikë e cila ka për synim të ndjekë një botë pa armë nukleare, raporton express.
Megjithatë, përfaqësuesit kanë përjashtuar çdo mundësi që Obama të kërkojë falje për sulmin tragjik. Këshilltari i tij për mediat, Ben Rhodes, u shpreh se Presidenti nuk do t’i rikthehet kësaj çështjeje, por do të japë mesazhe për një të ardhme bashkëpunuese midis dy vendeve.
Më herët, Presidenti i 39’të i Shteteve të Bashkuara, Jimmy Carter, e vizitoi Hiroshimën, por gjatë kohës që mandati i tij kishte përfunduar.
Sulmi bërthamor i amerikanëve e goditi Hiroshimën më datë 6 Gusht të vitit 1945.
Nga kjo tragjedi humbën jetën afro 140.000 njerëz ndërkohë që mijëra të tjerë pësuan dëmtime të ndryshme.
