Autoritetet italiane kanë nisur proçesin gjyqësor ndaj 32-vjeçarit shqiptar Zef Lleshi i cili akuzohet se në korrik të 2013, pasi ka pasur një zënkë të përsëritur, ka hedhur nga një apartament në katin e 9 bashkëshorten e tij Silvana Hyseni, 31 vjeç.
Lleshi u arrestua menjëherë pas ngjarjes së rëndë, por u la i lirë nga prokurori i Monzas, pasi mungonin provat bindëse kundër tij. Prokurori italian që po ndjek çështjen, bazohet te trajektoria e trupit të gruas dhe distanca 4 metra prej ndërtesës nga ishte hedhur, një distancë e madhe për dikë që do të vetëvritet.
Ndër të tjera në trupin e 32-vjeçarit shqiptar u gjetën asokohe shenja gërvishtjeje, çka shtojnë dyshimet te prokurorët se Silvana Hyseni ka tentuar të kapet fort pas bashkëshortit për të mos rënë. Karabinierët e arritur në vendngjarje kanë dëshmuar se kanë gjetur sende të thyera në banesë dhe skena e krimit i ngjante një vendi ku kishte pasur dhunë fizike.
Zef Lleshi i mohon akuzat dhe u kthye nga Suedia ku gjendej me punë, për të marrë pjesë në proçesin gjyqësor. Por e ëma e viktimës, Lana, pretendon se e bija kishte lënë jetën e saj të rregullt për shqiptarin, por ai nuk punonte dhe Silvana ishte detyruar të prostituohej.
E ëma e shqiptares thotë se grindjet mes çiftit kishin nisur pas Zef Lleshi kishte një lidhje me një grua tjetër në Shqipëri.
