Katër nga 9 personat e shpallur në kërkim, të cilët akuzohen si përgjegjës humbjen e jetëve nga ndërtesat e shembura nga tërmeti i 26 Nëntorit janë larguar drejt Italisë.
Për të tjerët, kërkimet janë përqendruar në rrethinat e Tiranës, Durrësit dhe Lezhë. Ndërkohë, grupi hetimor është fokusuar në gjetjen e provave për personat përgjegjës.
Numri i ndërtuesve ose i përgjegjësve që mund të dërgohen pas hekurave ose të shpallen në kërkim pritet të rritet sërish. Prokuroria e Krujës është në përfundim të akt-ekspertizave për gjetur personat përgjegjës, ku në Thumanë u shënua edhe numrin më i madh i viktimave nga tërmeti.
Paralelisht në ministrinë e Brendshme, Shërbimi për Çështjet e Brendshme dhe Ankesave po kryhen hetime edhe për dekonspirimin të operacionit. Dyshohet se mund të ketë pasur rrjedhje nga vetë uniformat blu gjatë ekzekutimit të urdhër-arresteve të lëshuar nga prokuroria e Durrësit dhe e Tiranës, duke çuar në fshehjen e personave të dyshuar si përgjegjës lidhur me pasojat e tragjedisë së 26 nëntorit.
Të shtunën policia bëri të ditur se janë firmosur 18 urdhër-arreste, dhe gjysma e tyre janë ekzekutuar.
Aktualisht janë prangosur 5 zyrtarë, pronarët e dy prej hoteleve të shembura në zonën e plazhit në Durrës, si dhe specialisti që ka përpiluar aktin e ekspertimit teknik të pallatit 6-katësh në Lagjen 6 në Durrës, ku humbën jetën dy persona. Organi i akuzës ka ngritur 4 akuza, “vrasje me dashje” “vrasje në rrethana të tjera cilësuese”, “shpërdorim detyre” dhe “falsifikim të dokumenteve”/ Opinion.al
