SPAK ka marrë të pandehur deputeten e Partisë Socialiste, Klotilda Bushka lidhur me dosjen ndaj kryetarit të Bashkisë së Tiranës, Erion Veliaj.
Ajo u hetua nga SPAK për pengim të zbulimit të së vërtetës. Prokuroria dyshon se deputetja socialiste ka orientuar dëshmitarët lidhur me deklarimet që duhet të jepnin kur të paraqiteshin në prokurori.
Kujtojmë se ditën e sotme, Prokuroria e Posaçme mori zyrtarisht të pandehur kryetarin e Bashkisë së Tiranës, Erion Veliaj, për katër akuza: korrupsion pasiv, pastrim parash, fshehje pasurie dhe futje e sendeve te palejuara në institucionet e ekzekutimit të vendimeve penale.
E pandehur u mor edhe bashkëshortja e tij, Ajola Xoxa, të cilës iu komunikuan akuzat për korrupsion, pastrim të parave dhe mosdeklarim të pasurisë, në bashkëpunim me kryebashkiakun.
Akuzë për futje të paligjshme të sendeve në qeli iu komunikua punonjësit të Policisë së Burgjeve, Fatjon Baci, i cili rezulton t’i ketë dhënë telefonin kryebashkiakut në mars të këtij viti për ta përdorur.
Për dosjen “Veliaj”, prokuroria ka kërkuar zgjatjen e afateve hetimore deri më 29 shtator.
