Kryetari i Partisë së Lirisë, Ilir Meta ka reaguar për hetimin e SPAK ndaj tij duke akuzuar kryeministrin, Edi Rama, se po përdor “krijesat” e partisë për të spostuar vëmendjen e opinionit publik.
Në një status në rrjetet sociale Meta, shkruan se ata që marrin urdhra në Kongresin e PS nuk bëjnë gjë tjetër veçse forcojnë bindjen e të gjithë shqiptarëve të ndershëm se janë një seksion i Rilindjes dhe përgjegjëse po aq sa ajo për korrupsionin dhe lidhjet e krimit me politikën.
Më tej ai thekson se hetimet do të thellohen jo vetëm për inceneratorët por edhe për Portin e Durrësit dhe afera të tjera për të cilat përgjegjës sipas tij është kryeministri Edi Rama.
“Hetimet tona vazhdojnë të thellohen dhe rëndohen jo vetëm për aferën e zezë të inceneratorëve, jo vetëm për superaferën e Portit të Durrësit kosto e të cilit mund të shkojë deri në 5 miliardë euro për taksapaguesit durrsakë dhe shqiptarë, por edhe për shumë afera të tjera, garant dhe përfitues kryesor i të cilave është Ramoviçi dhe për të cilat do të përgjigjet deri në një.
Përpjekjet e dëshpëruara për të keqpërdorur “krijesat” e Partisë në drejtësi për të spostuar vëmendjen e opinionit publik me “hetime” qesharake ndaj drejtuesve të opozitës tregojnë vetëm përpëlitjet e fundit të regjimit kriminal për të shtyrë me ditë dhe javë llogaridhënien e tij të pashmangshme.
Krijesat e Partisë që marrin urdhra në Kongresin e partisë-shtet veç forcojnë bindjen e të gjithë shqiptarëve të ndershëm se janë një seksion i Rilindjes dhe përgjegjëse po sa ajo për korrupsionin galopant dhe lidhjet e krimit me politikën. Monopolin e Drejtësisë e ka vetëm Populli i Shqipërisë dhe ai do të jetë Gjykatësi më i drejtë shumë shpejt.”, shkruan Meta./Opinion.al
