Rektori i Universitetit të Bujqësorit, Fatbardh Sallaku, ka reaguar lidhur me hetimet dhe masat e lëshuara nga SPAK për disa pedagogë të UBT.
Teksa foli para Grupit Parlamentar të PS-së, Fatbardh Sallaku deklaroi se ka dorëzuar telefonin dhe është treguar i gatshëm e bashkëpunues.
Teksa tha se nuk ndodhej aty për politikë, Sallaku theksoi se drejtësia të bëjë punën e vet.
“Shqipëria është me fat që ka Universitetin Bujqësor. Bujqësia boll është e diskriminuar nga të rinjtë.
Kemi qenë të hapur dhe bashkëpunues, nuk di asnjë lloj informacioni se çfarë është trajtuar.
Ligji i arsimit të lartë e ndan shumë mirë anën administrative me akademike.
Rektori me stafin akademik e mbaron punën e vet deri në dërgimin e buxhetit në senat.
Njësoj si këtu që Parlamenti miraton buxhetin, njësoj si në Senat.
Rektorati ka një vizion dhe mision për të arritur.
Kam qenë subjekt i marrjes së telefonit, jam treguar totalisht i gatshëm, e kam dhënë, nuk kam asgjë për të fshehur, kemi qenë bashkëpunues, do të jemi bashkëpunues, kemi dhënë dokumentacionet e kërkuara, por vetëm kaq.
Unë dua edhe njëherë të siguroj sepse ky është qëllimi kryesor, ju garantoj që nuk jam këtu për politikë. Kryeministrin e kam njoftuar, kemi folur edhe para 2-3 vitesh, kemi shkëmbyer koncepte dhe kemi ardhur këtu.
Kemi filluar bashkëpunimin, jemi të gatshëm. Debati të mos merret me anësoret por me thelbin. Ky universitet i duhet Shqipërisë, prindërit e studentit duhet të qetësohen në shtator do të shkojmë me një ofertë të re akademike. Stafi është i përkushtuar dhe shpresoj që personat nën hetim të gjejnë energjisë, i mirëkuptoj sepse është shqetësim i madh, dhe që çdo njeri të pastrojë imazhin. Drejtësia të bëjë punën e vet, i gatshëm për të dhënë çdo informacion.
Shpresoj që ky proces të mbarojë sa më shpejt në të mirën tonë të përbashkët”, tha Sallaku.
