Kryeministri i Maqedonisë së Veriut, Hristijan Mickoski ka reaguar ditën e sotme në lidhje me fshirjen e mbishkrimeve në shqip nga tabela në pikën kufitare Bllacë.
Sipas Mickoskit, këto veprime janë rezultat i panikut nga disa grupe që janë të shqetësuar për afrimin e hetimeve ndaj tyre.
Kryeministri maqedonas thotë gjithashtu se kjo s’është gjë tjetër, veçse pjesë e një plani për destabilizuar vendin.
“Cili institucion është nuk e di, mendoj se nuk është institucion, po mendoj se është pjesë e atij planit për destabilizim të atyre strukturave kriminale që në vitet e kaluara u pasuruan në kurriz të qytetarëve. Të atyre kriminelëve politik që pak nga pak kanë luajtur me institucionet, pak dhanë licenca për videolotari të egra, lotari online dhe kështu me radhë. Mendoj se ata tani janë të frikësuar sepse e dinë, marrin informacione se si ngadalë hetimi afrohet drejt tyre dhe ata të frikësuar tani reagojnë në këtë mënyrë, që ta destabilizojnë shtetin dhe nuk kanë sukses”,deklaroi Hristijan Mickoski, kryeministër.
Kujtojmë se të shtunën opozita shqiptare reagoi për heqjen e tabelave në gjuhën shqipe nga vendkalimet kufitare dhe zëvendësimimin e tyre me të reja, të cilat ishin vetëm në gjuhën maqedonase, angleze dhe frenge.
