Ka ndërruar jetë në moshën 86-vjeçare, ish-presidenti finlandez Martti Ahtisaari. Lajmi u bë i ditur nga Presidenca finlandeze. Ahtisaari shërbeu si presidenti i Finlandes nga viti 1994 deri në vitin 2000.
Ahtisaari, po ashtu u ngarkua nga OKB-ja në vitin 2005 për të gjetur një zgjidhje kompromisi për statusin e Kosovës si një mënyrë për t’i dhënë fund bllokimit që pasoi luftën e vitit 1999 dhe ndërhyrjen e NATO-s. Plani i tij për pavarësinë e mbikëqyrur së bashku me të drejtat për pakicën serbe të Kosovës u refuzua nga Serbia dhe Rusia, megjithatë, Kosova me mbështetjen perëndimore shpalli pavarësinë në 17 Shkurt të 2008-ës.
Mbi planin e Ahtisaarit është shpallur Pavarësia e Kosovës, i cili është mishëruar në Kushtetutën e Kosovës.
Martti Ahtisaari, fitoi edhe çmimin Nobel për paqe në vitin 2008-të.
Gjatë karrierës, Ahtisaari shërbeu edhe në disa funksione të rëndësishme në Ministrinë e Jashtme të këtij vendi si dhe në OKB.
I pikëlluar për vdekjen e 86 vjeçarit u shpreh edhe presidenti aktual i Finlandes Sauli Niinisto.
“Marti Ahtisaari besonte në njerëzit, qytetërimin dhe mirësinë, dhe ai jetoi një jetë të mrekullueshme, të jashtëzakonshme. Ai ishte presidenti i kohërave të ndryshimit, i cili e çoi Finlandën në epokën globale të BE-së”, tha ai.
