Kryeministri i Kosovës, Ramush Haradinaj ka thënë se deklaratat e tij në lidhje me kryeministrin Rama në Samitin e Berlinit kanë qenë ‘të vërteta’. Ai riktheksoi se Thaçi dhe Rama u angazhuan që ai të reflektojë për shkak të autoriteteve të larta evropiane.
Haradinaj foli për deklaratat në distancë që dy kryeministrat kanë patur dhe shtoi se nuk duhen marrë si të tilla.
“Etiketimet nuk duhet me i marrë si të tilla. Unë mund të ia konfirmoj opinionit që kam shprehur respekt dhe mbështetje për të majtën, por këto nuk i kam thënë në ndonjë agjendë. Unë e kam treguar një të vërtetë që ka ndodhur në Berlin, e që në mënyra të ndryshme e konfirmuan edhe vet” tha Haradinaj në një intervistë.
Kreu i qeverisë së Kosovës foli edhe për një samit të shkuar të organizuar në Durrës, kur në Ministër i Jashtëm në Shqipëri ishte Ditmir Bushati.
Haradinaj thotë se në atë kohë, Bushati i kishte thënë se nuk mund të dalë e të kundërshtojë idenë e shkëmbimit të territoreve për shkak se “e kam shef Edi Ramën”.
“Ishte samiti i Durrësit dhe erdhi ministri Markoviç, më vonë u bashkua komisionari Hahn dhe në një rast i thashë Ditmir Bushatit, ‘i nderuar ministër, si ka mundësi që ju nuk e keni një qartësi në respektim të territoreve të Kosovës dhe si nuk dilni kundër lëvizjes me territore për Kosovën’, ai më tha që ‘unë e kam shef Edi Ramën dhe nga ai varët se sa do të jem në Qeveri’”, ka thënë Haradinaj, duke shtuar se nga këto përvoja e bëjnë që të ketë kujdes.
Kryeministri i Kosovës u shpreh se është takuar me Kryeministrin Rama dhe Presidentin Meta gjatë festimit të 20 vjetorit të çlirimit të Kosovës, duke theksuar se nuk ka pasur rast të sqarohet me të për mosmarrëveshjet pas Samitit të Berlinit.
“Unë i përshëndeta publikisht edhe kryeministrin Rama dhe presidentin Meta, është mirë që kanë ardhur. Nuk kam pasur rast të sqarohem. Unë e pata ftuar edhe në hapjen e Autostradës “Arbën Xhaferi,” ai më pati premtuar që do të vijë, por nuk erdhi, pastaj nuk kam pasur rast”, ka thënë Haradinaj. /Opinion.al
