Presidenti i vendit, Ilir Meta, e ka cilësuar si tentativë për grusht shteti shkeljen e njëanshme të Marrëveshjes së 5 Qershorit.
“Të mos devijohet asnjë milimetër nga Marrëveshja e 5 Qershorit, të mos përdorim gjoja lista të hapura për të prishur marrëveshjen. Përshëndes opozitën që ka qenë e hapur për lista 100% të hapura. Në rast se mazhoranca nuk dëshiron të hapë listat e saj s’ka pse pengon forcat e tjera të hapin listat. Në rast se do të kemi shkelje të njëanshme të marrëveshjes, ashtu siç është bërë me ndryshimet e njëanshme kushtetuese, është e qartë që kemi tentativë për grusht shteti dhe kuptohet që grushti i shtetit do të shtypet nga grushti i popullit, se është më i madh”, tha Meta.
Kur u pyet nëse do e linte postin e Presidentit për një post në qeveri, kreu i shtetit theksoi:
“Unë kam qenë gjithmonë i gatshëm që të lë poste vetëm që të gjenden zgjidhje afatgjata për vendin. Por, ju siguroj se në të gjitha rastet, premtimin që kam bërë, që ky institucion deri në 24 korrik 2022 do të jetë kështjellë e pamposhtur në mbrojtje të Kushtetutës, do ta mbaj me të gjitha mënyrat. Ky institucion ka mbrojtur Kushtetutën në mënyrën më të vendosur”./Opinion.al
