Gara për ndërtimin e aeroportit të Vlorë është hapur për herë të dytë nga qeveria.
Ministrja e Infrastukturës dhe Energjitikës, Belinda Balluku ka njoftuar në një deklaratë se qeveria ka vendosur të rihapë garën më 23 nëntor.
Projekti i aeroportit të Vlorës u prezantuar nga kryeministri Rama në shtator të vitit 2019. Ai nuk dha atëherë detaje për procesin e kontraktimit të kompanisë ndërtuese por tha se aeroporti do të ndërtohet nga buxheti i shtetit.
Zyrtarisht gara për ndërtimin e aeroportit të Vlorës u hap më 19 dhjetor të vitit 2019. Afati i garës u la deri më 12 mars dhe ministrja, Belinda Balluku tha atëherë se punimet do të nisin më 31 maj 2020.
Por siç u shpreh sot ministrja, procesi u ngri si pasojë e pandemisë, mbylljes së vendit dhe krizës ekonomike të operatorëve të aviacionit civil.
“Pas kërkesave të shumta që kemi pasur nga investitorët kemi vendosur që duke filluar nga 23 nëntori të hapim garën ndërkombëtare për ndërtimin dhe operim e aeroportit ndërkombëtar të Vlorës, e cila do të qëndrojë hapur edhe për 30 ditë, deri në 23 dhjetor të këtij viti. Më pas, ne do të marrim kohën e duhur, atë të vendosur në ligj prej 2 javësh, për të vlerësuar ofertat që do të kenë arritur deri në datën 23 dhjetor. Në mes të muajit Janar, ne, stafet tona dhe ekspertët, sigurisht dhe konsulentët që na kanë mbështetur në të gjithë këtë proces, do kenë mundësi që të nxjerrin një fitues. Shpresojmë një konsorsum ndërkombëtar i cili të jetë i denjë për ndërtimin e aeroportit të shqiptarëve.”, tha Balluku. /Opinion.al
