Hamasi ka thënë se do të ekzekutojë një peng izraelit në përgjigje të çdo bombardimi të ri në Rripin e Gazës që vjen pa një paralajmërim paraprak.
Këtë lajm e ka dhënë doktor Basem Naim, kreu i marrëdhënieve politike dhe ndërkombëtare të Hamasit në një intervistë në Sky News.
Dr Naim kishte pohuar se grupi nuk ka “vrarë asnjë civil” që kur militantët e tij kaluan kufirin nga Rripi i Gazës dhe nisën një sulm të befasishëm ndaj Izraelit të shtunën.
I pyetur se sa pengje kishte marrë dhe sjellë grupi militant në Rrip, Dr Naim tha se nuk mund të konfirmonte një numër të saktë, por tha se ata do të trajtoheshin në një “mënyrë njerëzore, në një mënyrë të duhur”. Ai tha se mund të “garantojë 100%” se ata do të jenë të sigurt dhe u janë dhënë urdhra luftëtarëve që të mos vrasin ose dëmtojnë njerëz të moshuar, gra apo fëmijë.
Megjithatë, pak çaste më vonë, një zyrtar tjetër i Hamasit tha se do të fillonte ekzekutimin e robërve civilë izraelitë në këmbim të çdo bombardimi izraelit të shtëpive të civilëve në Rripin e Gazës pa paralajmërim.
Dy ditët e dhunës midis Izraelit dhe Hamasit thuhet se kanë lënë të paktën 900 izraelitë dhe 500 palestinezë të vdekur deri më tani.
Ndërkohë, Izraeli ka urdhëruar gjithashtu një “rrethim të plotë” të Rripit të Gazës, territorit palestinez të qeverisur nga Hamasi, duke e lënë atë pa ushqim, energji elektrike apo karburant./Opinion.al
