TIRANË- Lidhur me ngjarjen e djeshme ku një makinë shpërtheu në ecje zbardhen të tjera detaje. Grupi hetimor bën të ditur se në makinën e ushtarakut ishte vendosur tritol C4. Ai ndodhet në gjendje të rëndë në Spitalin e Traumës me plagë kryesisht në gjymyrët e poshtëm.
Elton Imeri, është oficer në Policinë Ushtarake në Durrës. Duket se profesioni nuk ka lidhje me këtë ngjarje aq sa konfliktet fisnore.
Pista ku janë përqendruar hetimet e Policisë së Tiranës lidhet me një hasmëri të vjetër të fisit të tij, me familjen Xhabafti në Yzberisht, ndonëse ai vetë nuk ka qenë asnjëherë i përfshirë.
Konflikti mes këtyre dy fiseve ka sjellë prej kohësh vrasje e atentate me eksploziv nga të dyja palët, që prej vitit 1992. Rreth një vit më parë, në një atentat të ngjashëm me eksploziv, por që i kushtoi jetën drejtuesit të mjetit, ndodhi në Vorë, ku mbeti i vrarë Baki Xhabafti. Nga ana tjetër, policia po heton edhe ndonjë lidhje të mundshme me një ngjarje që u parandalua në kohë, po në zonën e Kombinatit, korrikun e këtij viti, kur në makinën e kushëririt të Imerit, u zbulua një sasi e konsiderueshme eksplozivi.
Sipas gazetës Panorama, e cila u referohet burimeve policore, atentati i djeshëm mund të ketë lidhje me atë të kushëritit të 34vjeçarit, biznesmenit Ervis Imeri, të cilit iu vendos 600 gramë eksploziv në makinën e marrë me qira, por fatmirësisht ai e konstatoi para se të shpërthente.
