Komisioni i Jashtëm i Parlamentit Evropian diskutoj këtë të martë në lidhje me reformën në drejtësi, që të gjehet kompromisi dhe të votohet me 21 korrik në Kuvend.
Edhe një herë tjetër, me një gjuhë tejet të drejtpërdrejtë është theksuar domosdoshmëria e miratimit të kësaj reforme në 21 korrik, para pushimeve se në të kundërt rrezikohet e ardhmja evropiane e Shqipërisë.
Në fjalën e tij, Komisioneri për Zgjerimin, Johanes Hahn parashtroi edhe një alternativë në rastin se më 21 korrik reforma nuk votohet në Parlament.
“Nëse nuk do merret një vendim, ka mundësi të ketë një referendum se mendoj që 90% e popullsisë është pro reformës”, deklaroi Hahn.
Ai theksoi se nëse reforma nuk kalon, prespektiva evropiane për këtë vend do minohet.
Pikërisht në të njëjtën kohë, ambasadori amerikan në Tiranë, Donald Lu, foli në një protestë të organizuar nga shoqëria civile për miratimin e reformës në drejtësi.
Disa politikanë nuk e duan reformën. Ka njerëz të fuqishëm që kanë frikë nga reforma në drejtësi”, tha Lu.
“Por qytetarët po kërkojnë ndryshimin. Ata e duan reformën”.
“Është koha për të vendosur”.
Ambasadori amerikan tha se ka takuar disa deputetë, të cilët janë gati të vendosin në të mirë të vendit.
Më pas ai bëri një paralajmërim, duke thënë se do ketë pasoja në rast se nuk votohet reforma.
“Do ketë pasoja specifike negative nga SHBA për ata që nuk do e votojnë”.
