Sekretari i Përgjithshëm i Kombeve të Bashkuara Antonio Guterres, është shprehur se kamionët që transportojnë ndihma duhet të lejohen që të hyjnë në Gaza.
Ai thotë se ka parë “kaq shumë kamionë të ngarkuar me ujë, me karburant, me ilaçe, ushqime”, duke shtuar se këta kamionë do të ishin një ” shpëtim” dhe “ndryshim midis jetës dhe vdekjes për kaq shumë njerëz në Gaza”.
Guterres këto komente i bëri në pikëkalimin Rafah, që është pikëkalimi i vetëm që lidh Egjiptin me Rripin e Gazës.
Pas sulmit të Hamasit ndaj Izraelit më 7 tetor, ky i fundit rrethoi Gazën dhe bllokoi dërgesat e ujit, ushqimeve dhe karburanteve.
Por, pas vizitës së presidenti amerikan, Joe Biden, në Tel Aviv më 18 tetor, Izraeli u pajtua që të lejojë ndihmat të shkonin në Gazë.
Megjithatë, ndihmat e grumbulluara në Egjipt për Gazën ende nuk janë lejuar që të kalojnë pikën kufitare në Rafah për 2.3 milionë palestinezët në Rripin e Gazës.
