Ish-kryeministri Sali Berisha ka komentuar përplasjen mes deputetëve në nisjen e seancës plenare e cila degradoi deri në përplasje fizike.
Berisha përmes një lidhje live në “Facebook”, pasi seanca u pezulluar për disa minuta pas tensioneve, i konsideroi skena të tilla si provokim.
“Kjo skenë që shihni ju sot, kjo skenë që përbën një provokacion të ulët, banditesk ndaj opozitës e krijon fakti sepse këta bajlozë krimi në qeveri, këta hajdutë që kanë humbur çdo normë etike, morale, ligjore na përjashtojnë ne deputetëve të opozitës nga të drejtat kushtetuese të deputetit.
Një nga të drejtat më themelore kushtetuese të deputetit në parlament është e drejta e tij së bashku me 35 deputetë të tjerë të ngrejë komision hetimor parlamentar për të bërë transparencën për problemet e mëdha që ai konsideron.
Kjo e drejtë e sanksionuar nga kushtetuta nuk mund ti mohohet askujt. Mbledhja e firmave për një komision hetimor parlamentar, është automatike ngritje e komisionit. Por kjo nuk ndodh, sepse Edi Rama i ngërthyer nga aferat e tmerrshme vjedhje dhe korrupsioni, në drogë. Këta që besojnë se mund të shkelmojnë kushtetutën, këta janë banditë, këta janë një bandë e turpshme që nuk kanë asnjë moral dhe ligj.
Siç e shihni banda Rama ka vetëm një qëllim të mbrojë Edi Ramën, lidhjet e tij me drogën, vjedhjet e mëdha që u bën shqiptarëve, dhunimin e votës.
Edi Ramës i ka ardhur fundi, opozita është e vendosur që këtë betejë në Parlament ta mbrojë me gjithë forcën.
Ky është Parlamenti i Edi Ramës që funksionon si repart garde jo më si institucion. Turp! Turp!”, tha Berisha./Opinion.al
