Një nga funksionarët më të lartë të PD-së në kohën e qeverisjes së Berishës, Shaban Memia, ish-deputet dhe ish- drejtori i ALUIZNI-t është përfshirë në debatin pro dhe anti Basha që ka shpërthyer në PD pas humbjes së zgjedhjeve. Memia në një intervistë për për “Gazeta Shqiptare” shprehet se, përpara se të zbulohen “armiqtë” e brendshëm, do të ishte në të mirën e PD-së të zbuloheshin shkaqet pse ka qendra votimi në të cilat nuk është marrë asnjë votë, gjë e cila nuk ka ndodhur as në vitin 1991.
“Është cinike dhe poshtëruese përpjekja për t’i bërë avokati kësaj disfate nga disa drejtues të niveleve të ndryshme të strukturave të PD-së, përfshirë edhe zëdhënësen e kësaj force politike”, thotë Memia. “Dua t’iu them ‘avokatëve’ të disfatës, se rezultatet janë të tilla që kërkojnë reflektim dhe jo anatemim”, vijon ai.
Sipas Memisë, u bë linçimi nga politika zyrtare e mijëra e mijëra demokratëve për të vetmin fakt se nuk pajtohen në asnjë rrethanë me rezultatin e PD-së.
Ai e vazhdon idenë e tij duke thënë se “dhjetëra personalitete, pasi janë “pushkatuar” politikisht pa gjyq, përjashtuar në mënyrë ekstrastatutore, poshtëruese, arbitrare, klienteliste… linçohen në partinë që kanë krijuar, formatuar dhe i kanë shërbyer duke triumfuar për një çerek shekulli?!”
Duke argumentuar më tej, qëndrimin e Bashës pas zgjedhjeve, Memia shprehet se “linçimi është shumë djallëzor, sepse nga njëra anë bëhet për të shmangur analizën dhe shkaqet e vërteta të humbjes. Pikërisht për këtë arsye kërkohet pak ndershmëri, për t’i parë të vërtetat në sy”.
“Unë jam kundër metodave së sekuritase (Shërbimet Sekrete Romune), të pëshpëritjes te veshi, sepse jam ithtar i institucioneve, metodave legale, dhe besoj te vlerat. Por demokratëve dhe shqiptarëve u kemi detyrim për të bërë opinion publik, pasi me heshtjen i kemi lënë demokratët në raport me njërën anë të medaljes. Vetëm duke respektuar statutin, rregullat dhe kriteret legale e transparente, partia bëhet më e fortë, konkurruese, sepse energjitë orientohen në vizione qeverisëse, në beteja me kundërshtarin, dhe rreshtimi partiak bëhet sipas rrathëve koncentrikë”, vijon Shaban Memia.
