Në një dalje për mediat kreu i qeverisë maqedonase Zoran Zaev hodhi dyshimin se Nikola Gruevski edhe mund të jetë rrëmbyer.
“Ne duhet të hetojmë nëse Gruevski e ka lëshuar vendin vullnetarisht apo është rrëmbyer” tha kryeministri Zoran Zaev në konferencën e sotme për shtyp, sipas raportimit të mediave vendase.
“Ne do të bëjmë gjithçka që Nikolla Gruevski ta vuajë dënimin këtu në Maqedoni. Dhe publikisht po parashtroj pyetjen, duke ditur këtë, si kanë ndodhur gjërat, a e ka lëshuar vullnetarisht zoti Gruevski Maqedoninë, para se Gjykata ta ketë lëshuar urdhërin për arrestimin e tij apo edhe mund të jetë rrëmbyer, pres përgjigje edhe nga Gruevski dhe nga Hungaria”, tha Zaev.
Kujtojmë që ish-Kryeministri Gruevski është larguar drejt Hungarisë, ku ka kërkuar azil politik pas lëshimit në drejtim të tij të një flete arresti. Në 11 Nëntor, vetëm dy ditë para se të lëshohej fletëarresti, Gruevski ka dalë nga Shqipëria në kufirin me malin e Zi, me një makinë të ambasadës hungareze, shoqëruar nga një punonjës i saj.
