Një 53-vjeçar është dënuar me rreth 3 vite burg, pasi akuzohet se ka dhunuar vajzën e tij kur ajo ka vendosur të mbante shaminë myslimane.
53-vjeçari me origjinë shqiptare në Volos është dënuar me tre vjet e tre muaj burg pa lirim me kusht, si autor në një incident në familje.
Mediat vendase bëjnë me dije së ngjarja ka ndodhur në Stefanovikio, pasditen e së dielës, ku 24-vjeçarja shqiptare është dhunuar nga babai i saj, i cili e ka sulmuar dhe e ka goditur në fytyrë.
Vazja ka vendosur të mbajë shaminë sipas traditës myslimane, pasi “është në fazën e kërkimit personal fetar”. Megjithatë, ajo ka shpjeguar se agresioni i 53-vjeçarit është një “dukuri” e shpeshtë në familje, ndaj nënës dhe vëllait të saj 13-vjeçar.
Bëhet me dije se vazja jeton vetëm dhe punon në Londër në fushën e Biomjekësisë, pasi mbaroi studimet u kthye të shtunën në Greqi për të vizituar familjen për disa ditë.
Siç ka dëshmuar 24-vjeçarja si dhe nëna e saj, që nga ardhja e saj i akuzuari ishte agresiv ndaj vendimit të saj për të ndërruar fenë sepse “do ta bënte atë rezil”, dhe nuk pranonte kurrsesi të floiste për këtë temë me vajzën e tij.
“Ose hiqe këtë ose do ta heq me dhunë”, ndërsa ai këmbëngulte t’i thoshte “ke humbur mendjen dhe ke marrë rrugën e djallit”.
Kur pasditen e së dielës, 24-vjeçarja doli në tarracë e veshur me shami, 53-vjeçari pasi e ka kërcënuar, e ka sulmuar me grushte vajzën dhe ka vazhduar ta rrahë.
“Më ka goditur sërish si të mitur, ka goditur shumë herë nënën time dhe vëllain tim. Nuk është diçka që ai e bën kur është duke pirë, ai sulmon kur është esëll, është nervoz. Mendoj se ai ka një problem kontrolli. Ai ka refuzuar të marrë ndihmë psikologjike dhe ne e kemi falur shumë herë”, citoi 24-vjeçarja.
Ajo nuk pranoi ta zgjidhte çështjen jashtë gjykatës përmes procesit të ndërmjetësimit penal, pasi ajo shpjegoi:
“Mendoj se do të ndodhë sërish. Ai pendohet, por më vonë bën përsëri të njëjtën gjë. Unë kam pasur shumë herë frikë se ai do t’i zbatojë kërcënimet e tij. Tani u pendua vetëm pasi e kuptoi që e denoncova”.
I pandehuri u përpoq të bindë gjykatën për pendimin e tij të sinqertë. Në përfundim të deklaratës së tij, i pandehuri tha se veprimet e tij ishin një “gabim” që nuk do të përsëritet.
Gjykatësi e shpalli fajtor 53-vjeçarin shqiptar për të gjitha akuzat, lëndim të rrezikshëm trupor në familje, pasi ndaj tij rëndojnë akuzat për dhunë të vazhdueshme në familje dhe abuzim verbal./Opinion.al
