Një sasi rekord prej 33.5 kilogramësh ar është sekuestruar prej autoriteteve doganore greke në pikën kufitare të Kipusit, në kufirin greko-turk.
Sipas autoriteteve greke, ngarkesa prej 18 pllakash ari me peshë 33.5 kilogramë në total, ishte e fshehur në bordin e një taksie që po dilte nga Greqia, me destinacion Stambollin.
Një pjesë e ngarkesës, 14 kilogramë, ishte fshehur në pjesën e brendshme të portave dhe në shasinë e automjetit, ndërsa pjesa tjetër në çantat personale të 3 pasagjerëve që po udhëtonin.
Vlera e arit të sekuestruar llogaritet nga 800 mijë deri në një milion euro, ndërsa akciza që shteti grek do të humbiste vlerësohet në afro 200 mijë euro.
Kjo është sasia më e madhe e arit të kapur ndonjëherë në Greqi.
Dogana greke bën të ditur se, po heton prejardhjen e ngarkesës, por dyshohet se ajo është grumbulluar në pikat e shumta të grumbullimit nëpër qytetet e vendit, të cilat grumbullojnë sende me vlerë nga grekët e gjendur në vështirësi ekonomike, të cilët shesin me çmime qesharake sende floriri si orë të shtrenjta, madje në disa raste edhe dhëmbët e florinjtë, për të paguar koston e lartë të taksave dhe barrën e rëndë fiskale, që iu është ngarkuar prej qeverisë.
Të arrestuarit u dërguan në Gjykatën e Komotinisë për masë sigurie, ndërsa sasia e arit dhe automjeti i trafikantëve u sekuestruan./T.CH
