Detaje të reja janë zbuluar lidhur me koncertin e Mozzik dhe Getinjos që u ndërpre papritur nga Policia mbrëmjen e djeshme në Kosovë.
Zëdhënësi i Policisë së Gjilanit, Ismet Hashani, ka bërë të ditur në një prononcim për ‘Telegrafi’ se ngjarja ka ndodhur rreth orës 1:50.
“Drejtoria rajonale e Policisë Gjilan, Stacioni Policor Gjilan me datën 28.07.2023 rreth orës 1:50 ka marrë informacion se në oborrin e një diskoteke në qytetin e Gjilanit ka patur të shtëna me armë zjarri”, thotë Hashani.
Policia ka dalë menjëherë në vendin e ngjarjes, ku si pasojë është gjetur një gëzhojë plumbi si dhe një granatë dore e pashpërthyer.
“Njësitë policore relevante i janë përgjigjur rastit. Në vendin e ngjarjes është gjetur një gëzhojë e armës si dhe një granatë dore e cila ishte e pashpërthyer. I dyshuari është larguar nga vendi i ngjarjes në drejtim të paditur”, ka thënë më tej Hashani.
Të pranishmit në diskotekë janë evakuuar në mënyrë të sigurtë si dhe është menaxhuar mjeti i pa shpërthyer.
“Të gjithë personat të cilët kanë qenë brenda kësaj diskoteke në mënyrë të sigurte janë evakuuar. Nga ana e zyrtarëve policor është bërë sigurimi i vendit të ngjarjes ndërsa mjeti i pa shpërthyer është menaxhuar dhe është asgjësuar pa asnjë pasojë nga njësiti për deminim i Policisë së Kosovës” informoi policia e Kosovës.
Mozzik përmes pamjeve të publikuara në InstaStory, ka shfaqur momentet kur policia ka qenë pjesë e investigimit të ngjarjes.
“Respekte policia e Kosovë ka kryer vetëm punën e saj” shkruan Mozzik në një postim në facebook.
Koncerti është ndërprerë për çështje sigurie.
