TIRANE- Një grabitje me maska ka ndodhur sot në mëngjes në vendin e quajtur “Xhamlliku në Porcelan. Disa persona me maska i kanë dalë para një qytetari dhe pasi e kanë rrahur kanë arritur ti marrin shumën prej 10 mijë eurosh që kishte me vete.
Policia e Tiranës bën të ditur se ngjarja ndodhi rreth orës 07:05, në rrugën “Ali Baushi”. Persona ende të paidentifikuar, me maska kanë goditur me grushte shtetasin A. D. dhe i kanë marrë një shumë prej 10.000 eurosh. Dyshohet se autorët janë larguar me mjetin tip “Golf”.
Sakaq policia sqaron edhe rrethanat, ccka lë të kuptohet se autorët kanë pasur dijeni për lëvizjen e këtij qytetari me një shumë të madhe monetare në xhep.
Sipas policisë, shtetasi i dëmtuar me iniciale A. D. sapo kishte dalë nga shtëpia e shtetasit E. T. ku kishte marrë shumën prej 10.000 euro, të cilën ja kishte dhënë borxh para disa kohësh.
Pak çaste pasi ka dalë nga banesa e shtetasit E. T., personat e maskuar i kanë marrë shumën monetare, duke e rrahur në mes të rrugës.
Policia thotë se personi që u grabit me dhunë në Tiranë është në gjendje të mirë shëndetësore dhe po punohet për zbulimin e autorëve.
“Pas marrjes së njoftimit policia ka shkuar menjëherë në vendngjarje , janë ngritur pika kontrolli, si dhe është bërë i mundur identifikimi i targës së automjetit që dyshohet se kanë lëvizur autorët”, thuhet në njoftimin e policisë.
