Një javë pas grabitjes spektakolare në pistën e aeroportit të Rinasit, policia nuk ka vënë ende në dispozicion të hetimit planin e masave të shtuara të sigurisë pas ngjarjeve terroriste në Stamboll. Pas njoftimit për hetimin e zyrtarëve të policisë, prokuroria ka kërkuar me shkresë zyrtare planin e masave të sigurisë por ky dokument nuk i është dhënë ende.
Një javë pas grabitjes spektakolare në pistën e aeroportit të Rinasit, grupi hetimor nuk ka ende në dorë planin e masave të sigurisë të hartuar nga Policia e Shtetit.
Masat presupozohet se ishin shtuar në bazë të një plani të përcaktuar qartë pas sulmeve terroriste në aeroportin e Stambollit, por një dokument i tillë nuk është ende në dorën e prokurorisë.
Burime pranë grupit hetimor pohuan se drejtuesve të Policisë së Shtetit iu është dërguar një shkresë zyrtare ku ju kërkohet të vënë në dispozicion të hetimit planin e masave të sigurisë së Aeroportit përfshi edhe ruajtjen e perimetrit të jashtëm.
Por edhe pse ka kaluar një javë nga ngjarja e rëndë grupi hetimor nuk e ka ende këtë informacion i cili do të sqaronte konfliktin tashmë të bërë publik mes TIA dhe Policisë për kompetencat e ruajtjes së Aeroportit.
Drejtori i Policisë se Tiranës një ditë pas ngjarjes tha se policia është përgjegjëse për sigurinë e udhëtarëve në Aeroportin Nënë Tereza, dhe veçanërisht në Pikën e Kalimit Kufitar Ajror, që është territori nga kabina e kontrollit, salla e tranzitit deri në vendqëndrimin e avionit.
Gjithashtu, Policia e Shtetit, bazuar edhe në masat e shtuara të sigurisë, të marra në kuadër të luftës kundër terrorizmit, kryen shërbim me patrulla të shtuara në kabinat e kontrollit të pasagjerëve në hyrje-dalje, në ambientet e brendshme dhe para terminalit të pasagjerëve, në ambientet e intervistimit të shtetasve të kthyer dhe për sigurimin e personave të shoqëruar në ambientet e Komisariatit.
Por në një deklaratë për mediat zëdhënësja e TIA tha se policia është autoriteti i vetëm që mund të futet me armë në pistën e aeroportit kjo edhe në kuadër të marrëveshjes koncesionare në pjesën ku flitet për sigurinë.
Por pavarësisht qëndrimeve të kundërta, prokuroria nuk e ka sqaruar ende se kush e kishte përgjegjësinë për ruajtjen e portës ku hyri automjeti i grabitjes dhe mungesën totale të reagimit nga punonjësit e policisë që presupozohet të ishin të shumtë në kuadër të masave të shtuara të sigurisë.
Për këtë arsye Prokuroria e Përgjithshme njoftoi se do të hetohen edhe zyrtarët e policisë për keqfunksionimin e planit të shtuar të masave, por edhe 1 javë pas këtij njoftimi grupi hetimor nuk ka në dorë asnjë plan masash.
Në mungesë të tij, prokuroria ka urdhëruar sekuestrimin e dokumenteve të bankës së cilës i përkisnin paratë.
Po kështu Prokuroria ka urdhëruar sekuestrimin e dokumenteve të kompanisë private të sigurimit “Nazeri”.
Sakaq krahas zyrtarëve të policisë, burimet bëjnë të ditur se do të hetohen edhe përfaqësues të Autoritetit të Aviacionit Civil dhe Ministrisë së Transporteve pasi edhe pse kanë konstatuar problematikë me sigurinë në aeroport, nuk kanë marrë asnjë masë për zgjidhjen e tyre.
Në lidhje me mungesën e sigurisë në aeroportin e Rinasit s’ka shprehur shqetësim edhe Shërbimi Informativ Shtetëror i cili në dy periudha të ndryshme ka njoftuar Ministrinë e Transporteve, Aviacionin civil dhe Policinë e Shtetit.
Vetëm një javë pas grabitjes punonjësit e kompanisë së sigurisë së aeroportit kanë ndërhyrë në portën e karburanteve nga ku hynë grabitësit, duke vendosur tela me gjemba në pjesën e sipërme të portës si dhe kanë shtuar elemente të tjera sigurie.
Po ashtu në mënyrë të vazhdueshme një agjent sigurie ka qëndruar në afërsi të portës, ndërsa një mjet patrullimi lëviz në të gjithë perimetrin e pistës.
Veç portës së karburanteve, pa kamera sigurie rezultojnë edhe dy porta të tjera shumë pranë pistës së avionëve, si dhe një portë e tretë, ajo para pistës i quajtur ndryshe këndi ndriçues për shkak se aty ndodhen prozhektorët e aeroportit, të cilët orientojnë pilotët në uljen e avionëve./Mapo
