TIRANE- Autorët e grabitjes spektakolare në autostradë të 3.8 mln eurove janë në arrati, ndërsa policia dhe prokuroria nuk ka asnjë të dyshuar deri më tani. Rojet e sigurisë së “Rogat Security” janë marrë disa herë në pyetje, por ata kanë dhënë në dëshmi të ndryshme, ç’ka shton edhe më më shumë dyshimet e hetuesve për rolin e tyre.
Shqiptarja.com, referuar burimeve të prokurorisë shkruan se “tre prej tyre pohuan se makina e grabitësve ishte fouristradë “Jeep” më mbishkrim dhe fenelinë policie. Dy të tjerët u shprehën vetëm se ishte një fouristradë e zezë pa fenelinë policie”.
Po kështu dëshmi kontradiktore ka edhe për veshjet e grabitësve. Në fillim ata kanë thënë se grabitësit ishin veshur si polic, më pas kanë ndryshuar dëshmi duke thënë se agresorët ishin veshur më kostume sportive dhe mbanin maska.
Grabitja ndodhi më 3 dhjetor, ndërsa policia private transportonte paratë e një banke të nivelit të dytë drejt Rinasit. Autorët dogjën edhe makinën e tyre duke fshirë çdo gjurmë të ngjarjes.
