Mbetet ende e paqartë grabitja e ndodhur ditën e djeshme pranë hotel Sheraton, teksa policia vijon hetimet, por dyshimet janë ngritur edhe mbi dy punonjësit e këmbimit valutor.
Kjo pas dëshmisë që ka bërë në polici vetë pronari i këmbimit valutor i cili ka nënvizuar faktin se punonjësit e tij kanë bërë lëvizje të dyshimta gjatë momentit që janë grabitur, mëson “Panorama.al”.
Sipas asaj që ka thënë para grupit hetimor pronari i këmbimit valutor, bazuar edhe nga video ku duken momentet e grabitjes, ai nënvizon se personi që kishte paratë në dorë, nuk ka bërë asnjë lëvizje për të mbrojtur paratë nga grabitësit të cilët nuk ishin as të maskuar dhe as me armë.
Kjo e vë në dyshime se mund të ketë një lidhje mes punonjësve të tij dhe grabitësve.
Megjithatë, në dëshminë e tij në polici, Sajmir Hasani, personi që mbante paratë, ka thënë se ka qenë një moment që është hutuar nga ngjarja dhe nuk ka mundur të bëjë dot asgjë për të ndaluar autorët t’i merrnin paratë, apo t’i ndiqte.
Policia po heton edhe pistën se ndoshta vjedhja e parave është bërë nga persona të brendshëm, duke qenë se grabitësit nuk kishin armë me vete.
Dy autorët u larguar me motor në drejtim të paditur, ndërsa janë ende në kërkim.
Policia ka marrë në pyetje Hasanin dhe shoqëruesin e këmbimit valutor, ndërkohë që ata thanë se grabitja ndodhi shumë shpejt dhe se nuk mundën të ndalnin të dyshuarit pasi u larguan me motor.
Policia pritet të ballafaqojë dhe dëshminë e një qytetari që ka parë ngjarjen, i cili tha se punonjësi i këmbimit, por edhe Hasani, nuk vepruan pasi atyre iu morën paratë.
